ବୌଦ୍ଧ: ଶ୍ରୀରମ ନବମୀ ଠାରୁ ଦୀର୍ଘ ୧୮ଦିନ ଧରି ବୌଦ୍ଧଜିଲାର ସର୍ବପୂରାତନ ଅଗ୍ରଣୀ ସାଂସ୍କୃତିକ ଅନୁଷ୍ଠାନ ରାମଲୀଳା ନାଟ୍ୟ ସଂସଦ ପକ୍ଷରୁ ସ୍ଥାନୀୟ ମାରୁତୀମଣ୍ଡପ ଠାରେ ଚାଲିଆସୁଥିବା ବୌଦ୍ଧ ଗଡଜାତର ଗଣପର୍ବ ରାମଲୀଳା ଯାତ୍ରା ବୁଧବାର ଦିନ ଉଦଯାପିତ ହୋଇଛି । ମାରୁତି ମଣ୍ଡପ ଠାରେ ରାମଲୀଳା ଯାତ୍ରାରେ ମର୍ଯ୍ୟାଦା ପୁରୁଷତ୍ତମ ଶ୍ରୀ ରାମଚନ୍ଦ୍ରଙ୍କ ଲୀଳାକୁ ନାଟକ ମାଧ୍ୟମରେ ରାମଜନ୍ମ ଠାରୁ ରାଜ୍ୟାଭିଷେକ ପର୍ଯ୍ୟନ୍ତ ନାଟକ ପରିବେଷଣ କରାଯାଇଥିଲା । ସମସ୍ତ ନାଟକ ଗୁଡିକ ରାମଲୀଳା ନାଟ୍ୟ ସଂସଦର କଳାକାର ମାନଙ୍କ ଦ୍ୱାରା ପରିବେଷଣ ହୋଇଥିଲା । ଏହି ଯାତ୍ରାର ବିଶେଷତ୍ୱ ହେଉଛି ଏହାର ପରମ୍ପରା । ଅନୁଷ୍ଠାନର ବ୍ରତୀମାନେ ୧୮ ଦିନ ଧରି ଗୃହତ୍ୟାଗୀ ହେବା ସହିତ ଦିନକୁ ଗୋଟିଏ ଓଳି ଅନ୍ନ ଭକ୍ଷଣ କରିବା ଓ ସମସ୍ତ ସୁଖ ସୁବିଧାକୁ ତ୍ୟାଗ କରି ଭୂମିରେ ଶୋଇବା ସହ ନିଷ୍ଠାର ସହିତ ଯାତ୍ରାରେ ଅଭିନୟ ପ୍ରଦର୍ଶନ କରିଥାନ୍ତି ।
୧୮ଦିନ ରାମଲୀଳା ଯାତ୍ରାର ମୁଖ୍ୟ ଆର୍କଷଣ ହେଉଛି ରାବଣ ବଧ । ଗତ ମଙ୍ଗଳବାର ଦିନ ରାତି ତମାମ ରାମ ରାବଣଙ୍କ ସମର ଶୋଭାଯାତ୍ରା ବିରାଟ ପଟୁଆରରେ ବାହାରି ସହର ପରିକ୍ରମା କରିବା ପରେ ପଲ୍ଲିଶ୍ରୀ ମେଳା ପଡିଆ, ଜିଲା ଷ୍ଟାଡିୟମ, ବାଘଗୁଡା ଛକ ଓ ଯାତ୍ରା ପଡିଆ ଠାରେ ଉଭୟ ସେନା ମୁହାଁମୁହିଁ ହୋଇଥିଲେ । ଜିଲା ଷ୍ଟାଡିୟମ, ଯାତ୍ରାପଡିଆ ସମେତ ସହରର ବିଭିନ୍ନ ଛକରେ ଆତସବାଜୀ କାର୍ଯ୍ୟକ୍ରମ, ମେଲୋଡି କାର୍ଯ୍ୟକ୍ରମ ସହିତ ବିଭିନ୍ନ ରଙ୍ଗାରଙ୍ଗ ସାଂସ୍କୃତିକ କାର୍ଯ୍ୟକ୍ରମକୁ ରାତିସାରା ଦର୍ଶକମାନେ ଉପଭୋଗ କରିଥିଲେ । ଜିଲା ତଥା ଜିଲା ବାହାରୁ ୫୦ ହଜାରରୁ ଊର୍ଦ୍ଧ୍ଵ ଦର୍ଶକ ଏହି ଯାତ୍ରାର ଅନ୍ତିମ ଦିବସରେ ସାମିଲ ହୋଇଥିଲେ । ଶେଷରେ ଯାତ୍ରା ପଡିଆଠାରେ ପରିବେଷଣ ହୋଇଥିଲା ନାଟକ ରାବଣ ବଧ । ବୁଧବାର ପ୍ରତ୍ୟୁଷରେ ୪୦ ଫୁଟ ଉଚ୍ଚର ରାବଣର ପ୍ରତିକୃତି ଶ୍ରୀରାମଙ୍କ ବ୍ରହ୍ମାସ୍ତ୍ରରେ ଖଣ୍ଡ ବିଖଣ୍ଡିତ ହେବାରେ ଚାରିଆଡେ ଜୟଶ୍ରୀରାମ ଧ୍ୱନି ଗୁଂଜିରତ ହୋଇ ଉଠିଥିଲା ।
ରାବଣବଧ ପରେ ବୁଧବାର ଦିନ ପ୍ରଭୁ ଶ୍ରୀରାମଙ୍କ ରାଜ୍ୟାଭିଷେକ ହୋଇଥିବା ବେଳେ ଏଥି ପାଇଁ ମଧ୍ୟ ସାରା ସହରର ଉତ୍ସବ ମୁଖର ହୋଇପଡିଥିଲା । ଏହି ଅବସରରେ ଯାତ୍ରା ପଡିଆ ଠାରୁ ଏକ ସୁସଜ୍ଜିତ ରଥରେ ପ୍ରଭୁ ଶ୍ରୀରାମ , ଅନୁଜ ଲକ୍ଷ୍ମଣ, ମାତା ସୀତା ଓ ହନୁମାନଙ୍କୁ ସହରର ପରିକ୍ରମା କରାଯାଇଥିଲା । ଏହି ଶୋଭାଯାତ୍ରାରେ ଦୁଲଦୁଲି ସହିତ ବିଭିନ୍ନ ଘଣ୍ଟବାଦ୍ୟ ଓ ଆର୍ଟ ଟେମ୍ପୁଲର ଶିଶୁ କ୍ରୀଡାବିତ ମାନଙ୍କ ଦ୍ୱାରା ବିଭିନ୍ନ କୌଶଳ ପ୍ରଦର୍ଶନ ହୋଇଥିଲା । ଦୁଇବର୍ଷର କରୋନା କଟକଣା ପରେ ଚଳିତବର୍ଷ ଶ୍ରୀ ରାମଲୀଳା ଯାତ୍ରାର ଅଦ୍ଭୁତପୂର୍ବ ସଫଳତା ଓ ଭକ୍ତମାନଙ୍କ ସହଯୋଗ ପାଇଁ ନାଟ୍ୟ ସଂସଦର ସଭାପତି ମୃତ୍ୟୁଞ୍ଜୟ ମିଶ୍ର, ସଂପାଦକ ମନୋଜ କୁମାର ସାହୁ ଓ ସମସ୍ତ କର୍ମକର୍ତ୍ତା ଜିଲାବାସୀ ଏବଂ ସର୍ବୋପରି ବୌଦ୍ଧର ଲୋକପ୍ରିୟ ଜିଲାପାଳଙ୍କ ଅଦମ୍ୟ ଉତ୍ସାହ ଯୋଗୁଁ ଅନୁଷ୍ଠାନ ପକ୍ଷରୁ କୃତଜ୍ଞତା ପ୍ରକାଶ କରାଯାଇଛି ।
