ନୂଆଦିଲ୍ଲୀ: ମିରଟ ସରଧନାର ବିଜେପି ବିଧାୟକ ସଙ୍ଗୀତ ସୋମଙ୍କ ଘର ଉପରକୁ ଆକ୍ରମଣ ହୋଇଥିବା ଅଭିଯୋଗ ହୋଇଛି । ବୁଧବାର ବିଳମ୍ବିତ ରାତିରେ ବିଧାୟଙ୍କ କେଣ୍ଟସ୍ଥିତ ଘର ଉପରକୁ ଦୁର୍ବୃତ୍ତମାନେ ପ୍ରଥମେ ଗୁଳିମାଡ କରିଥିଲେ ଓ ପରେ ଗ୍ରେନେଡ୍ ପକାଇ ସେଠାରୁ ଫେରାର ହୋଇଯାଇଥିଲେ। ସୌଭାଗ୍ୟବଶତଃ ଏଥିରେ କେହି ମୃତାହତ ହୋଇ ନଥିବା ଜଣାପଡିଛି ।
ସେଠାରେ କାର୍ଯ୍ୟରତ ଗାର୍ଡଙ୍କ ସୂଚନା ଅନୁଯାୟୀ, ରାତି ପ୍ରାୟ ୧୨ଟା ୪୫ ମିନିଟ୍ ସମୟରେ ଗେଟ୍ ନିକଟରେ ଏକ ସ୍ବିପ୍ଟ କାରରେ ପହଞ୍ଚିଥିଲା । କଳା ରଙ୍ଗର ପୋଷାକ ପିନ୍ଧିଥିବା ବନ୍ଧୁକଧାରୀ ଜଣେ ଦୁର୍ବୃତ୍ତ କାରରୁ ଓହ୍ଲାଇ ଘର ଉପରକୁ ଆଖିବୁଜା ଗୁଳି ଚଳାଇଥିଲା । ଏମାନେ ପ୍ରାୟ ୪ ରାଉଣ୍ଡ ଗୁଳି ଚାଳନା କରିଥିବା ଅନୁମାନ କରାଯାଉଛି । ଗାର୍ଡ ଏହାର ପାଲଟା ଜବାବ ଦେବା ପୂର୍ବରୁ ଦୁର୍ବୃତ୍ତ ଜଣଙ୍କ ଏକ ଗ୍ରିନେଡ୍ ଫିଙ୍ଗି ତୁରନ୍ତ ଘଟଣାସ୍ଥଳରୁ ଫେରାର ହୋଇଯାଇଥିଲା। ଗ୍ରେନେଡ୍ ଟି ଯାଇ ବିଧାୟକଙ୍କ ଗାଡି ତଳେ ପଡିଥିଲା । ହେଲେ ତାହା ବିସ୍ଫୋରଣ ହୋଇ ନଥିଲା ବୋଲି ଗାର୍ଡ କହିଛନ୍ତି ।
ଏହି ଘଟଣା ପୁଲିସ ଓ ପ୍ରଶାସନର ନିଦ ହଜାଇ ଦେଇଛି । କର୍ତ୍ତବ୍ୟ ଅବହେଳାରୁ ୫ ଜଣ ପୁଲିସ ଅଧିକାରୀଙ୍କୁ ନିଲମ୍ବିତ କରାଯାଇଥିବା ଜଣାପଡିଛି। ଫୋରେନସିକ ଟିମ୍ ଓ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଘଟଣାସ୍ଥଳରୁ ଖୋକା ସହ ଅଫୁଟା ଗ୍ରେନେଡ୍ ଜବତ ହୋଇଛି ବୋଲି ଏସଏସପି ଅଖିଳେଶ କୁମାର କହିଛନ୍ତି । ଏହି ଘଟଣା ପରେ ବିଧାୟକଙ୍କ ଘରେ ପୁଲିସ ମୁତୟନ କରାଯାଇଛି ।
ଏହି ଘଟଣା ପରେ ବିଧାୟକ ସଙ୍ଗୀତ ସୋମ କହିଛନ୍ତି ଯେ, କୌଣସି ସୂତ୍ରରୁ ମୋତେ ଧମକ ମିଳି ନାହିଁ । କିନ୍ତୁ ଦୁଇ ବର୍ଷ ପୂର୍ବେ ଏକ ଫୋନ୍ କଲ ଆସିଥିଲା, ଯେଉଁଥିରେ ଗ୍ରେନେଟ୍ ଆକ୍ରମଣରେ ହତ୍ୟା କରାଯିବ ବୋଲି କୁହାଯାଇଥିଲା।
