ୟୁକ୍ରେନ ଶିଶୁର ଚମତ୍କାର ସାହସ ; ୧ ହଜାର କିଲୋମିଟର ଏକାକୀ କଲା ଯାତ୍ରା

ନୂଆଦିଲ୍ଲୀ : ରୁଷ-ୟୁକ୍ରେନରେ ଜାରି ରହିଛି ଯୁଦ୍ଧ। ଯୁଦ୍ଧ ମଧ୍ୟରେ ବିଭିନ୍ନ ଘଟଣା ସାମ୍ନାକୁ ଆସିଥିବା ବେଳେ ବର୍ତ୍ତମାନ ଏକ ୧୧ ବର୍ଷର ୟୁକ୍ରେନ ଶିଶୁର ଚମତ୍କାର ସାହାସ ଏବେ ଚାରି ଆଡେ ବେଶ ଚର୍ଚ୍ଚା ହେଉଛି। ଶିଶୁଟି ପ୍ରାୟ ୧ ହଜାର କିଲୋମିଟର ଏକାକୀ ଯାତ୍ରା କରିଛି। ଯାତ୍ରା ପରେ ସ୍ଲୋଭାକିଆରେ ପହଞ୍ଚିଥିଲେ।
ବାଳକଟିର ନାମ ପ୍ରକାଶ କରାଯାଇ ନାହିଁ କିନ୍ତୁ ସେ ଦକ୍ଷିଣ-ପୂର୍ବ ୟୁକ୍ରେନର ଜାପୋରିଜିଆର ବାସିନ୍ଦା। ଗତ ସପ୍ତାହରେ ରୁଷ ସେନା ଏହି ଅଞ୍ଚଳକୁ ଅଧିକୃତ କରିଥିଲେ। ଖବର ଅନୁଯାୟୀ, ଅସୁସ୍ଥ ସମ୍ପର୍କୀୟଙ୍କ ଯତ୍ନ ନେବା ପାଇଁ ତାଙ୍କ ପିତାମାତାଙ୍କୁ ୟୁକ୍ରେନରେ ରହିବାକୁ ପଡିଥିଲା।
ସୂଚନାନୁଯାୟୀ, ପରିବାର ଜଣେ ବୟସ୍କଙ୍କ ସ୍ୱାସ୍ଥ୍ୟ ଅବସ୍ଥା ଭଲ ନଥିବାରୁ ଉକ୍ତ ଶିଶୁର ମାତାପିତାଙ୍କୁ ୟୁକ୍ରେନରେ ହିଁ ରହିବାକୁ ପଡିଥିଲା। ମାତ୍ର ଯୁଦ୍ଧରୁ ନିଜ ପୁଅକୁ ସୁରକ୍ଷିତ ରଖିବାକୁ ଆପଣାଇଥିଲେ ଏହି ଅଭିନବ ଉପାୟ। ସେ ପୁଅକୁ ଏକ ଟ୍ରେନରେ ବସାଇ ସ୍ଲୋଭାକିଆରେ ଥିବା ବନ୍ଧୁଙ୍କ ନିକଟରେ ପଠାଇଥିଲେ। ବନ୍ଧୁ ଜଣକ ଯେପରି ତାଙ୍କ ପୁଅକୁ ଚିହ୍ନିପାରିବେ, ଶିଶୁ ହାତରେ କିଛି ପୋଷାକ,ପାଣି ବୋତଲ ଓ ଏକ ଚିଠି ,ପାସପୋର୍ଟ ଦେଇଥିଲେ। ଶିଶୁଟି ସୀମାରେ ପହଞ୍ଚିବା ପରେ ସେଠାକାର ସେନା ତାଙ୍କୁ ସହଯୋଗ କରିଥିଲେ। ପୁଅର ନିକଟରେ ଥିବା ଫୋନ ନମ୍ବରରେ ଫୋନ କରିଥିଲେ। ସମ୍ପର୍କୀୟ ପହଞ୍ଚି ଶିଶୁକୁ ନିଜ ସହ ନେଇଥିଲେ। ସୀମାରେ ସୁରକ୍ଷିତ ପହଞ୍ଚିଥିବାରୁ ସ୍ଲୋଭାକିଆ ସରକାର ଓ ସେନାଙ୍କୁ ଶିଶୁର ମାଆ କୃତଜ୍ଞତା ଜଣାଇଛନ୍ତି। ଯୁଦ୍ଧ ଭିତରେ ଏହି କୁନି ପୁଅର ଅଦମ୍ୟ ସାହସ ଏବେ ଚର୍ଚ୍ଚାର ବିଷୟ ପାଲଟିଛି। ଶିଶୁଟି ପ୍ରାୟ ୧ ହଜାର କିଲୋମିଟର  ଏକାକୀ ଯାତ୍ରା କରି ପହଞ୍ଚିଛି। ଯାତ୍ରା ପରେ ମଧ୍ୟ ଶିଶୁଟିର ମୁହଁରେ ହାଲିଆ, ଡର ଟିକେ ମଧ୍ୟ ଦେଖିବାକୁ ମିଳି ନଥିଲା।
ଏହି କଷ୍ଟଦାୟକ ଯାତ୍ରା ସମାପ୍ତ କରିବା ପରେ, ପିଲାଟିର ହସ, ନିର୍ଭୟ ଏବଂ ନିଷ୍ଠା ପାଇଁ ଅନେକ ପ୍ରଶଂସାର ସୁଅ ଛୁଟୁଛି। ପିଲାଟିକୁ କୁହାଯାଉଛି ଅସଲି ହିରୋ।
ସ୍ଲୋଭାକିଆର ଆଭ୍ୟନ୍ତରୀଣ ମନ୍ତ୍ରଣାଳୟ ସୋସିଆଲ ମିଡିଆରେ ଏକ ମନ୍ତବ୍ୟ ପୋଷ୍ଟ କରି ବାଳକଟିର ନିର୍ଭୟ ଏବଂ ନିଷ୍ଠାକୁ ପ୍ରଶଂସା କରିଛି।