ପାଟଣା: ଢେଙ୍କିକୋଟ ପଞ୍ଚାୟତ ଅନ୍ତର୍ଗତ ଲଙ୍ଗଳକଣ୍ଟି ଗ୍ରାମରେ ପେସା ଆକ୍ଟ ଓ ଜଙ୍ଗଲ ସୁରକ୍ଷା ଆଇନ ଏବଂ ନିଶା ନିବାରଣ ନିମନ୍ତେ ଗ୍ରାମବାସୀଙ୍କ ଦ୍ବାରା ଏକ ସଚେତନତା ସଭା ଅନୁଷ୍ଠିତ ହୋଇଯାଇଛି। ଆଗାମୀ ଦିନରେ ଲଙ୍ଗଳକଣ୍ଟି ଗ୍ରାମକୁ ଏକ ଉନ୍ନତ ଗ୍ରାମରେ ପରିଣତ କରିବା ସହ ଗ୍ରାମର ଆଦିବାସୀ, ପଛୁଆ ବର୍ଗ ଏବଂ ସମସ୍ତ ଗ୍ରାମବାସୀଙ୍କ ଜୀବନଧାରଣ ମାନରେ ପରିବର୍ତ୍ତନ ଆଣିବା ଦିଗରେ କାମ କରିବା ନେଇ ସଭାରେ ଆଲୋଚନା ହୋଇଥିଲା। ଗ୍ରାମର ପ୍ରଧାନ ତଥା ବ୍ୟାଙ୍କ ପରିଚାଳକ ପ୍ରଫୁଲ୍ଲ କୁମାର ସିଂହଙ୍କ ସଭାପତିତ୍ୱରେ ଆୟୋଜିତ ବୈଠକକୁ ରୁଦ୍ର ନାରାୟଣ ସିଂହ ପରିଚାଳନା କରିଥିବା ବେଳେ ମୁଖ୍ୟଅତିଥି ଭାବେ ରାଷ୍ଟ୍ରୀୟ ଅନୁସୂଚିତ ଜନଜାତି ଆୟୋଗ ସଦସ୍ୟ ଅନନ୍ତ ନାୟକ ଯୋଗ ଦେଇଥିଲେ।
ଶ୍ରୀ ନାୟକ ପେସା ଆଇନ ସମ୍ପର୍କରେ ସଚେତନତା କରାଇବା ସହ ଲଙ୍ଗଳକଣ୍ଟି ଗ୍ରାମକୁ ରାଜ୍ୟର ପ୍ରଥମ ପେସା ଆଇନ ଅନ୍ତର୍ଭୁକ୍ତ ଗ୍ରାମରେ ପରିଣତ କରିବା ଲକ୍ଷ ନେଇ କାର୍ଯ୍ୟ କରିବାକୁ ଆହ୍ୱାନ କରିଥିଲେ। ଅନ୍ୟମାନଙ୍କ ମଧ୍ୟରେ ଗ୍ରାମର ଅବସରପ୍ରାପ୍ତ ବିଦ୍ୟୁତ କର୍ମଚାରୀ ହୃଷିକେଶ ନାୟକ, ଶରତ ନାୟକ, ଜୟଦେବ ଗିରି, ଦୀପକ କୁମାର ସିଂହ, ଶୁକଦେଵ ସିଂହ, ହୃଷିକେଶ ଗିରିଙ୍କ ସହ ଗ୍ରାମର ଶତାଧିକ ମହିଳା ଓ ପୁରୁଷ ବୈଠକରେ ସାମିଲ ଥିଲେ।
