ଅହମ୍ମଦାବାଦ: ୱେଷ୍ଟଇଣ୍ଡିଜ୍-ଭାରତ ୩ୟ ତଥା ଅନ୍ତିମ ଦିନିକିଆ ମ୍ୟାଚ୍ ଆଜି ଖେଳାଯିବ।ଭାରତ ୩-୦ରେ ଶୃଙ୍ଖଳା ପୋଛିବା ଲାଗି ଦୃଢ଼ ଦାବିଦାର ଭାବେ ରହିଛି। ବୁଧବାର ୨ୟ ଦିନିକିଆକୁ ଜିତି ଭାରତ ୨-୦ରେ ଆଗୁଆ ରହି ଶୃଙ୍ଖଳା ହାତେଇ ସାରିଛି। ତେଣୁ ୩ୟ ଦିନିକିଆରେ ଭାରତ ଏକାଦଶରେ କିଛି ପରିବର୍ତ୍ତନ କରି ଅନ୍ୟ ଖେଳାଳିଙ୍କୁ ସୁଯୋଗ ଦେବାର ପ୍ରୟାସ କରିବ। ଅନ୍ୟପକ୍ଷରେ ୱେଷ୍ଟଇଣ୍ଡିଜ୍ ବ୍ୟାଟିଂ ବିଭାଗରେ ଉନ୍ନତ ପ୍ରଦର୍ଶନ କରିବାର ପ୍ରୟାସ କରିବ।
ପ୍ରଥମ ୨ଟି ଦିନିକିଆରେ ଭାରତ ସମସ୍ତ ବିଭାଗରେ ପ୍ରତିପକ୍ଷ ଇଣ୍ଡିଜ୍ଠାରୁ ଭଲ ପ୍ରଦର୍ଶନ କରିଛି। ୨ୟ ଦିନିକିଆରେ ଭାରତ ୯ ୱିକେଟରେ ୨୩୭ ରନ୍ କରିଥିବା ବେଳେ ବ୍ୟାଟିଂ ଉପଯୋଗୀ ପିଚ୍ରେ ମଧ୍ୟ ୱେଷ୍ଟଇଣ୍ଡିଜ୍ ୨ ଶହ ରନ୍ ପାର କରି ପାରିନାହିଁ। ୨ୟ ମ୍ୟାଚ୍ରେ ୩ ପେସ୍ ବୋଲର କିମାର ରୋଚ୍, ଆଲ୍ଜାରି ଜୋସେଫ୍ ଓ ଓଡିଅନ୍ ସ୍ମିଥ୍ ପ୍ରଭାବିତ କରିଥିଲେ। ହେଲେ ୱେଷ୍ଟଇଣ୍ଡିଜ୍ ବ୍ୟାଟ୍ସମ୍ୟାନଙ୍କୁ ଅନୁରୂପ ପ୍ରଦର୍ଶନ କରିବାକୁ ପଡ଼ିବ।
