ଶିଶୁକନ୍ୟାକୁ ଦୁଷ୍କର୍ମ ଅଭିଯୋଗରେ ଅପରାଧୀକୁ ଧରିଲା ପୁଲିସ, ଆସନ୍ତାକାଲି ହେବ କୋର୍ଟ ଚାଲାଣ

ଲକ୍ଷ୍ମୀପୁର: କୋରାପୁଟ ଜିଲା ଲକ୍ଷ୍ମୀପୁର ଥାନା ଅଞ୍ଚଳରେ ଘଟିଛି ଏକ ଅଭାବନୀୟ ଘଟଣା। ଏହି ଥାନା ଅନ୍ତର୍ଗତ ଏକ ଗ୍ରାମରେ ୬ ବର୍ଷର ଏକ କୋମଳମତି ଶିଶୁକନ୍ୟା ପ୍ରତି ଦୁଷ୍କର୍ମ ହୋଇଥିବା ନେଇ ଲକ୍ଷ୍ମୀପୁର ଥାନାରେ ଅଭିଯୋଗ ହୋଇଛି। ଅଭିଯୁକ୍ତ ହେଉଛି ଓଡିଆପେଣ୍ଠ ଗ୍ରାମର ଭାଲୁ ମାର୍ଥା(୬୦) । ଘଟଣା ପରେ ସମ୍ପୃକ୍ତ ଆସାମୀ ଫେରାର ଥିଲା। ଖୋଜାଖୋଜି କରିବା ପରେ ତାକୁ ବିରିଗୁଡାରୁ ଧରି ଥାନାକୁ ଅଣାଯାଇ ଅଟକ ରଖାଯାଇଛି। ଘଟଣା ହେଉଛି ୬ ତାରିଖରେ। ତେବେ ଦୁଷ୍କର୍ମର ଶିକାର ହୋଇଥିବା ଶିଶୁଟି ଭୟରେ ଘରେ କିଛି କହିନଥିଲା। ତା’ର ଦେହ ଅସୁସ୍ଥ ହେବାରୁ ୮ ତାରିଖ ଦିନ ଘଟଣା ଜଣାପଡିଥିଲା। ୬ ତାରିଖରେ ଘର ସାମ୍ନାରେ ଖେଳୁଥିବା ବେଳେ କେହି ନଥିବାର ସୁଯୋଗ ନେଇ ମାର୍ଥା ଏଭଳି ଅପକର୍ମ କରିଥିବା ପୁଲିସ ସୂତ୍ରରୁ ଜଣାପଡିଛି । ଏନେଇ ପୋକ୍ସୋ ଆଇନ୍ ଅନୁଯାୟୀ ଏକ ମାମଲା ରୁଜୁ ହୋଇଛି ବୋଲି ତଦନ୍ତ ଭାର ନେଇଥିବା ଥାନା ଅଧିକାରୀ ଶ୍ବେତପଦ୍ମା ସେଠ୍ ପ୍ରକାଶ କରିଛନ୍ତି। ଉଭୟଙ୍କ ଡାକ୍ତରୀ ମାଇନା କରାଯିବା ପରେ ଆସାମୀକୁ ଗୁରୁବାର ଅଦାଲତ ଚାଲାଣ କରାଯିବ ବୋଲି ଶ୍ରୀମତୀ ସେଠ୍ ପ୍ରକାଶ କରିଛନ୍ତି। ଏହି ଘଟଣା ଅଞ୍ଚଳରେ ଆଲୋଡ଼ନ ସୃଷ୍ଟି କରିଛି।