ମୁଖ୍ୟମନ୍ତ୍ରୀଙ୍କୁ ପ୍ରଧାନମନ୍ତ୍ରୀଙ୍କ ପ୍ରଶଂସା

ନୂଆଦିଲ୍ଲୀ,  (ନି.ପ୍ର): ସଂଘୀୟ ବ୍ୟବସ୍ଥାରେ କେନ୍ଦ୍ର ସରକାରଙ୍କ ସମସ୍ତ ଆର୍ଥିକ ସଂସ୍କାର କାର୍ଯ୍ୟକ୍ରମକୁ ଓଡ଼ିଶା ଅଗ୍ରଣୀ ରାଜ୍ୟ ଭାବେ କାନ୍ଧକୁ କାନ୍ଧ ମିଶାଇ ଲାଗୁ କରିଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଭିନନ୍ଦନ ଜଣାଇଛନ୍ତି। ରାଜ୍ୟସଭାରେ ରାଷ୍ଟ୍ରପତିଙ୍କୁ ଧନ୍ୟବାଦ ପ୍ରସ୍ତାବ ଆଲୋଚନାରେ ପ୍ରଧାନମନ୍ତ୍ରୀ ଶ୍ରୀ ମୋଦି କହିଥିଲେ ଯେ ଏକଦା ଦେଶର ପ୍ରାକୃତିକ ସମ୍ପଦ କିଛି ନର୍ଦ୍ଧିଷ୍ଟ ଲୋକଙ୍କ ସମ୍ପତ୍ତି ବୃଦ୍ଧି କରିବା

କାମରେ ଲାଗୁଥିଲା। ଏବେ ଖଣିଜ ସମ୍ପଦ ରାଷ୍ଟ୍ରର ରାଜକୋଷ ବୃଦ୍ଧି କରୁଛି। ଆମେ କୋଇଲା ଓ ଖଣିଜ କ୍ଷେତ୍ରରେ ସଂସ୍କାର ଆଣି ପାରଦର୍ଶୀ ପ୍ରକ୍ରିୟାରେ ଖଣିଜ ସମ୍ପଦର ନିଲାମି କରି ଆର୍ଥିକ ସଂସ୍କାର ପ୍ରକ୍ରିୟା ଜାରି ରଖିଛୁ। ବୈଧ ଲାଇସେନ୍ସଗୁଡ଼ିକର ବିନା ଦେୟରେ ହସ୍ତାନ୍ତର, ଉତ୍ପାଦିତ କୋଇଲାର ୫୦% ଖୋଲା ବଜାରରେ ବିକ୍ରି ଅନୁମତି, କୋଇଲା ଖଣିରୁ ଖନନ ଓ ଉତ୍ତୋଳନ କାର୍ଯ୍ୟ ଶୀଘ୍ର ଆରମ୍ଭ ଉପରେ ୫୦% ରିହାତି ଆଦି ନିଷ୍ପତି ଫଳରେ ଗତ ଏକ ବର୍ଷ ମଧ୍ୟରେ ଦେଶର ଖଣିଜ ରାଜସ୍ୱ ୧୪ ହଜାର କୋଟିରୁ ବୃଦ୍ଧି ପାଇ ୩୫ ହଜାର କୋଟିରେ ପହଞ୍ଚିଛି।

ନିଲାମି ପ୍ରକ୍ରିୟାରେ ରାଜ୍ୟ ସରକାରଙ୍କୁ ସିଧାସଳଖ କୋଇଲା ଖଣି ନିଲାମି ରାଜସ୍ୱ ମିଳିବା ସବୁଠାରୁ ବଡ଼ କଥା ଥିଲା। ଆର୍ଥିକ ସଂସ୍କାର ଲାଗୁ ଫଳରେ ରାଜ୍ୟ ସରକାର ମାନେ ଲାଭବାନ ହୋଇଛନ୍ତି, ଅର୍ଥାତ ଦେଶର ମଙ୍ଗଳ ହୋଇଛି। ସଂଘୀୟ ବ୍ୟବସ୍ଥାରେ କେନ୍ଦ୍ର ସରକାର ନେଇଥିବା ନିଷ୍ପତିଗୁଡ଼ିକ ମଧ୍ୟରେ ଖଣିଜ କ୍ଷେତ୍ରରେ ସଂସ୍କାର ଏକ ଗୁରୁତ୍ୱପୂର୍ଣ୍ଣ ନିଷ୍ପତି ଥିଲା ବୋଲି ପ୍ରଧାନମନ୍ତ୍ରୀ ମୋଦି ଦର୍ଶାଇଥିଲେ।