ଖତ ଖାଉଛି ବସୁଧା ଯୋଜନା: ୬ବର୍ଷ ହେଲା ଓଭର ହେଡ୍ ଟାଙ୍କିକୁ ଚାତକ ଭଳି ଚାହିଁ ବସିଛନ୍ତି ଗ୍ରାମବାସୀ
ରେଙ୍ଗାଲି: ସମ୍ବଲପୁର ଜିଲ୍ଲା ରେଙ୍ଗାଲି ବ୍ଳକ୍ ଲଇଡା ଗ୍ରାମ ପଞ୍ଚାୟତ ଅନ୍ତର୍ଗତ ଭାଗିପାଲି ଏବଂ ବୈଜାପଲି ଗ୍ରାମକୁ ବସୁଧା ଯୋଜନାରେ ଓଭର ହେଡ୍ ଟାଙ୍କିରୁ ଷ୍ଟାଣ୍ଡ ପୋଷ୍ଟ ଜରିଆରେ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ୬ବର୍ଷ ହେଲା ଷ୍ଟାଣ୍ଡ୍ ପୋଷ୍ଟ ଏବଂ ଓଭର୍ ହେଡ୍ ଟାଙ୍କି ନିର୍ମାଣ କାମ ସମ୍ପୂର୍ଣ ହୋଇ ସାରିଛି। କିନ୍ତୁ ଏହି ଯୋଜନା କାର୍ଯ୍ୟକ୍ଷମ କରାଯାଉନାହିଁ। ଫଳରେ ଭାଗିପାଲି ଏବଂ ବୈଜାପାଲି ଗ୍ରାମର ଲୋକେ ଓଭର ହେଡ୍ ଟାଙ୍କିରୁ ଷ୍ଟାଣ୍ଡ୍ ପୋଷ୍ଟ ଜରିଆରେ ଆଉ କେତେ ବର୍ଷ ପରେ ପିଇବା ପାଣି ମିଳିବ ବୋଲି ଚାତକ ଭଳି ଚାହିଁ ବସିଛନ୍ତି। ରାଜ୍ୟ ସରକାର ଟେପ୍ ଟୁ ହୋମ୍ ଅର୍ଥାତ ଘରକୁ ଘର ପିଇବା ପାଣି ଯୋଗାଇ ଦେବାକୁ ଯୋଜନା ଘୋଷଣା କରି ସାରିଥିବା ବେଳେ ଭାଗିପାଲି ଏବଂ ବୈଜାପାଲି ଗ୍ରାମ ପାଇଁ ୬ବର୍ଷ ହେଲା ଲକ୍ଷାଧିକ ଟଙ୍କା ବ୍ୟୟ ଅଟକଳରେ ନିର୍ମିତ ପାନୀୟ ଜଳ ଯୋଗାଣ ପ୍ରକଳ୍ପ କାର୍ଯ୍ୟକାରୀ ନହୋଇ ଅକାରଣରେ ଖତ ଖାଉଛି। ଗାଁ ଲୋକେ ପାନୀୟ ଜଳ ପାଇଁ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ବିଭାଗୀୟ କର୍ତ୍ତୃପକ୍ଷଙ୍କୁ ଅନେକଥର ଏ ସଂକ୍ରାନ୍ତରେ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କୌଣସି ସୁଫଳ ମିଳୁ ନଥିବାରୁ ଜନସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଉଛି। ବସୁଧା ଯୋଜନା କାର୍ଯ୍ୟକ୍ଷମ ହେବାକୁ ଆଉ କେତେ ବର୍ଷ ଲାଗିବ ବୋଲି ଲୋକେ ପ୍ରଶ୍ନ କରୁଛନ୍ତି।
Comments are closed.