ମୁମ୍ବାଇ: ପ୍ରସିଦ୍ଧ କଣ୍ଠଶିଳ୍ପୀ ଲତା ମଙ୍ଗେସ୍କରଙ୍କ ସ୍ବାସ୍ଥ୍ୟବସ୍ଥାରେ ଉନ୍ନତି ଘଟିଛି। ସେ ନିକଟରେ କରୋନାରେ ସଂକ୍ରମିତ ହେବା ପରେ ତାଙ୍କର ନିମୋନିଆ (ସନ୍ନିପାତ) ହୋଇଯାଇଥିଲା। ସେ ମୁମ୍ବଇର ଏକ ଘରୋଇ ହସ୍ପିଟାରେ ଚିକିତ୍ସିତ ହେଉଛନ୍ତି। ସେ ଧୀରେ ଧୀରେ ସୁସ୍ଥ ହେଉଥିବା ମହାରାଷ୍ଟ୍ର ସ୍ବାସ୍ଥ୍ୟମନ୍ତ୍ରୀ ରାଜେଶ ଟୋପେ ରବିବାର ଗଣମାଧ୍ୟମକୁ କହିଛନ୍ତି। ୯୨ ବର୍ଷୀୟା ଲତା ମଙ୍ଗେସ୍କରଙ୍କୁ ଗତ ସପ୍ତାହରେ ତାଙ୍କୁ ଦକ୍ଷିଣ ମୁମ୍ବାଇର ବ୍ରିଜ୍ କ୍ୟାଣ୍ଡି ଡାକ୍ତରଖାନାର ଆଇସିୟୁରେ ଭର୍ତ୍ତି କରାଯାଇଥିଲା।
ଲତାଙ୍କ ଚିକିତ୍ସା ପାଇଁ ଏକ ଡାକ୍ତରୀ ଦଳ ଗଠନ କରାଯାଇଛି। ଲତା ଦିଦିଙ୍କ ଅଗଣିତ ପ୍ରଶଂସକ ତାଙ୍କର ସ୍ବାସ୍ଥ୍ୟବସ୍ଥା ବିଷୟରେ ଜାଣିବାକୁ ଚାହୁଁଥିବାରୁ ଏନେଇ ନିୟମିତ ତଥ୍ୟ ପ୍ରଦାନ କରିବାକୁ ଡାକ୍ତରଖାନା ମୁଖପାତ୍ରଙ୍କୁ ନିର୍ଦେଶ ଦିଆଯାଇଥିବା ମନ୍ତ୍ରୀ ଶ୍ରୀ ଟୋପେ କହିଛନ୍ତି।
