ସାରା ଦେଶରେ ଆଜି ଗଣେଶ ଚତୁର୍ଥୀର ଉତ୍ସବ ପାଳନ ହେଉଛି। ପ୍ରଭୁ ଗଣେଶଙ୍କୁ ବିଦ୍ୟା, ସୁଖ, ଶାନ୍ତି ଓ ସମୃଦ୍ଧିର ଦେବତା ବୋଲି କୁହାଯାଇଥାଏ। ଭଗବାନ ଗଣେଶଙ୍କୁ କେବଳ ଭାରତରେ ଶ୍ରଦ୍ଧାର ସହ ପୂଜା କରାଯାଇ ନଥାଏ ବରଂ ଦୁନିଆର ବିଭିନ୍ନ ଦେଶ ଏପରିକି ମୁସଲମାନ ବହୁଳ ଦେଶରେ ମଧ୍ୟ ଭଗବାନ ଗଣେଶଙ୍କ ପ୍ରତି ଶ୍ରଦ୍ଧା ଓ ବିଶ୍ୱାସ ରହିଛି। ସବୁଠାରୁ ବଡ଼ ମୁସଲମାନ ବହୁଳ ଦେଶ ଇଣ୍ଡୋନେସିଆ, ଯେଉଁଠି ମାତ୍ର ୩ ପ୍ରତିଶତ ହିନ୍ଦୁ ବାସ କରିଥାଆନ୍ତି ସେଠାକାର ନୋଟ୍ ଉପରେ ଭଗବାନ ଗଣେଶଙ୍କ ଫଟୋ ଛପା ହୋଇଥାଏ। ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ଏହା ସତ।
ଇଣ୍ଡୋନେସିଆର ମୁଦ୍ରାକୁ ରୁପିଆଃ କୁହାଯାଏ। ଏଠାକାର ୨୦ ହଜାର ଟଙ୍କାର ନୋଟ୍ ଉପରେ ପ୍ରଭୁ ଗଣେଶଙ୍କର ଚିତ୍ର ରହିଛି। ଏହି ମୁସଲମାନ ବହୁଳ ଦେଶର ଲୋକେ ଭଗବାନ ଗଣେଶଙ୍କୁ ଶିକ୍ଷା, କଳା ଓ ବିଜ୍ଞାନର ଦେବତା ବୋଲି ମାନି ଥାଆନ୍ତି। ଇଣ୍ଡୋନେସିଆର ଏହି ୨୦ ହଜାର ଟଙ୍କା ନୋଟ୍ର ଗୋଟିଏ ପାର୍ଶ୍ବରେ ଭଗବାନ ଗଣେଶଙ୍କ ଚିତ୍ର ଥିବା ବେଳେ ଅନ୍ୟ ପାର୍ଶ୍ବରେ ଶ୍ରେଣୀଗୃହର ଫଟୋ ଛପା ହୋଇଥାଏ। ଯେଉଁଥିରେ ଶିକ୍ଷକ ଓ ଛାତ୍ରଛାତ୍ରୀଙ୍କ ଚିତ୍ର ରହିଛି। ତେବେ ଚାଲନ୍ତୁ ଜାଣିବା କାହିଁକି ଏକ ମୁସଲମାନ ବହୁଳ ଦେଶର ମୁଦ୍ରାରେ ପ୍ରଭୁ ଗଣେଶଙ୍କୁ ସ୍ଥାନ ଦିଆଯାଇଛି।
ନୋଟ୍ରେ ପ୍ରଭୁ ଗଣେଶଙ୍କ ଫଟୋ ଛାପିବାର କାରଣ :
ସୂଚନା ଯୋଗ୍ୟ ଯେ, କିଛି ବର୍ଷ ପୂର୍ବେ ଇଣ୍ଡୋନେସିଆର ଅର୍ଥବ୍ୟବସ୍ଥାରେ କିଛି ସମସ୍ୟା ଦେଖା ଦେଇଥିଲା। ଏହାପରେ ସେଠାରେ ୨୦ ହଜାର ଟଙ୍କିଆ ନୂଆ ନୋଟ୍ ଜାରି କରାଯାଇଥିଲା, ଯେଉଁଥିରେ ଭଗବାନ ଗଣେଶଙ୍କ ଫଟୋ ଛପା ଯାଇଥିଲା। ଏହାକୁ ଛାପିବା ପଛରେ ଆର୍ôଥକ ବିଶେଷଜ୍ଞ ମାନଙ୍କର ବିଶ୍ୱାସ ଥିଲା ଯେ ଏହାଦ୍ୱାରା ଅର୍ଥ ବ୍ୟବସ୍ଥା ପୁଣି ସୁଦୃଢ ହୋଇଯିବ ଓ ବାସ୍ତବରେ ପରେ ସେହିପରି ହିଁ କିଛି ଦେଖିବାକୁ ମିଳିଥିଲା। ଦେଶର ଅର୍ଥ ବ୍ୟବସ୍ଥା ପୁଣି ସୁଦୃଢ ହୋଇଯାଇଥିଲା।
