ଲାଞ୍ଜିଗଡ଼:କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ବିଶ୍ୱନାଥପୁର ବନାଞ୍ଚଳ ଅର୍ନ୍ତଗତ କଦମଗୁଡା ଗ୍ରାମପଞ୍ଚାୟତରେ ଘଟିଛି ଏକ ଅଘଟଣ। ନିଜ ଘର ପାଖ ଧାନଖଳାରେ ଧାନ ଜଗି ଶୋଇଥିବା ବେଳେ ଜଙ୍ଗଲି ହାତୀଙ୍କ ଅତର୍କିତ ଆକ୍ରମଣର ଶୀକାର ହୋଇଛନ୍ତି ଜଣେ ଯୁବକ। ଏହି ଘଟଣାଟି ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ସୂଚନା ଅନୁଯାଇ ଖିକସାଭଟ୍ଟା ଗାଁର ଭୁବନ ଗଉଡ ନାମକ ଜଣେ ଯୁବକ ତାଙ୍କ ବାପାଙ୍କ ସହିତ ଘର ନିକଟରେ ଥିବା ଧାନଖଳାରେ ଶୋଇଥିଲେ। ବିଳମ୍ବିତ ରାତିରେ ଏକ ଜଙ୍ଗଲି ହାତୀ ପଲ୍ଲ ଧାନଖଳାକୁ ପଶି ଆସିବା ସହିତ ଖଳାରେ ଶୋଇଥିବା ଭୁବନଙ୍କୁ ଶୁଣ୍ଡରେ ଟେକି କଚାଡି ଦେଇଥିଲା।
ଏଥିରେ ଭୁବନ ଗୁରୁତର ଆହତ ହୋଇଥିବା ବେଳେ ଉଭୟ ବାପା ପୁଅଙ୍କ ଚିତ୍କାର ଶୁଣି ହାତୀପଲ୍ଲ ଜଙ୍ଗଲ ଆଡକୁ ଚାଲିଯାଇଥିଲେ। ଏ ସଂପର୍କରେ ଖବର ପାଇ ଏଲିଫେଣ୍ଟ ସ୍କ୍ୱାର୍ଡର କର୍ମଚାରୀ ମାନେ ଓ ଜଙ୍ଗଲ ବିଭାଗର କର୍ମକର୍ତ୍ତା ଗୁରୁତର ଆହତ ଭୁବନକୁ ଉଦ୍ଧାର କରି ନର୍ଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ପଠାଇଥିଲେ। ବର୍ତ୍ତମାନ ଭୁବନଙ୍କ ଚିକିତ୍ସା ଚାଲିଥିବା ବେଳେ ତାଙ୍କ ଅବସ୍ଥା ସ୍ଥିର ଥିବା ଜଣାପଡିଛି।
