ନୋଇଡ଼ା: ଉତ୍ତରପ୍ରଦେଶ ପୁଲିସ ମହାନିର୍ଦେଶକଙ୍କ ଗାଡ଼ିକୁ ଚିହ୍ନି ପାରି ନ ଥିବାରୁ ନୋଇଡ଼ାର ଦୁଇ ପୁଲିସ କର୍ମଚାରୀଙ୍କୁ ନିଲମ୍ବନ କରାଯାଇଛି। ନୂଆଦିଲ୍ଳୀରେ ଏକ ବୈଠକରେ ଯୋଗ ଦେବା ପାଇଁ ଉତ୍ତରପ୍ରଦେଶ ଡିଜିପି ଓ ପି ସିଂହ ନୋଇଡ଼ା ଦେଇ ଯାଉଥିଲେ। ଅପରାହ୍ଣ ପ୍ରାୟ ୩ଟା ବେଳେ ତାଙ୍କ ଗାଡ଼ିକୁ ଆମ୍ରପାଲି ପୁଲିସ ଚେକ୍ପୋଷ୍ଟଠାରେ ଅଟକାଯାଇଥିଲା। ସେଠାରେ ମୁତୟନ ସେକ୍ଟର ୩୯ ଥାନାର ଜଣେ ସବ୍ଇନସ୍ପେକ୍ଟର ଓ ଜଣେ କନେଷ୍ଟବଳ ଡିଜିପି କିମ୍ବା ତାଙ୍କ ଗାଡ଼ିକୁ ଚିହ୍ନି ନ ପାରି ଗାଡ଼ିର ତନଖି କରିଥିଲେ। ଏହି ଘଟଣା ପରେ ସେହି ଦୁଇ ଜଣଙ୍କୁ ନିଲମ୍ବନ କରାଯାଇଥିବା ଅଭିଯୋଗ ହୋଇଛି। ଅପରପକ୍ଷରେ ଏଭଳି ଅଭିଯୋଗକୁ ସ୍ଥାନୀୟ ପୁଲିସ ଅଧିକାରୀ ଖଣ୍ଡନ କରିଛନ୍ତି। କାର୍ଯ୍ୟରେ ଥିବା ବେଳେ ଦୁଇ ଜଣ କ୍ୟାପ୍ ନ ପିନ୍ଧି ପାଟ୍ରୋଲିଂ ଜିପ୍ରେ ରଖିଥିଲେ। ତେଣୁ ବିଶୃଙ୍ଖଳା କାରଣରୁ ସେମାନଙ୍କୁ ନିଲମ୍ବନ କରାଯାଇଥିବା ପୁଲିସ ଅଧିକାରୀ କହିଛନ୍ତି।
