ଆଠଗଡ: ଆଠଗଡସ୍ଥିତ ଗୋପବନ୍ଧୁ ମହିଳା ଡିଗ୍ରୀ କଲେଜ ଯୁବ ରେଡକ୍ରସ ପକ୍ଷରୁ ବୁଧବାର କୋଭିଡ ୧୯ ସଚେତନତା କାର୍ଯ୍ୟକ୍ରମ ଅନ୍ତର୍ଗତ ସଭା ଓ ପଥପ୍ରାନ୍ତ ନାଟକ ଅନୁଷ୍ଠିତ ହୋଇଯାଇଛି। କଲେଜ ଅଧ୍ୟକ୍ଷା ସଂଗୀତା ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ସଚେତନତା ସଭାରେ ସ୍ୱତନ୍ତ୍ର ଆମନ୍ତ୍ରିତ ବକ୍ତା ଭାବେ ଶ୍ରୀରାମଚନ୍ଦ୍ର ଭେଷଜ ମହାବିଦ୍ୟାଳୟର ସ୍ତ୍ରୀ ଓ ପ୍ରସୂତୀ ରୋଗ ବିଶେଷଜ୍ଞ ଡାକ୍ତର ଚିନ୍ମୟ ପଣ୍ଡା ଯୋଗଦାନ କରି କରୋନା ସଂକ୍ରମଣ ଆମ ରାଜ୍ୟ ଓ ଦେଶରୁ ସଂପୂର୍ଣ୍ଣ ରୂପେ ଯାଇନାହିଁ, ବରଂ ଏହା ନୂତନ ରୂପରେ ଏବେବି ଅନେକ ସ୍ଥାନରେ ଲୋକଙ୍କୁ ସଂକ୍ରମିତ କରୁଛି ବୋଲି କହିବା ସହ ସମସ୍ତେ ବ୍ୟାପକ ସତର୍କତା ଓ ସଚେତନ ରହିବା ଉପରେ ସେ ଗୁରୁତ୍ୱାରୋପ କରିଥିଲେ। ଏବେ କୋଭିଡର ଡେଲଟା ଷ୍ଟ୍ରେନର ସଂକ୍ରମଣ ହେଉଥିବାରୁ ଏହାର ଲକ୍ଷଣ ଏବଂ ଭୟାବହତା ସଂପର୍କରେ ଡାକ୍ତର ପଣ୍ଡା ବୁଝାଇବା ସହ ଏଥିପ୍ରତି ସଚେତନ ରହିବା ପାଇଁ ପରାମର୍ଶ ଦେଇଥିଲେ। ସମସ୍ତେ ମାସ୍କ ବ୍ୟବହାରକୁ ବଳବତ୍ତର ରଖିବା ସହ ପରସ୍ପର ମଧ୍ୟରେ ଶାରୀରିକ ଦୂରତ ବଜାୟ ରଖିବା ପାଇଁ କଲେଜ ଛାତ୍ରୀମାନଙ୍କୁ ପରାମର୍ଶ ଦେଇଥିଲେ। ଛାତ୍ରୀମାନେ ନିଜେ ସଚେତନ ହେବା ସହ ଅନ୍ୟମାନଙ୍କୁ ଏ ଦିଗରେ ସଚେତନ କରିବା ଲାଗି କଲେଜର ଅଧ୍ୟକ୍ଷା ଶ୍ରୀମତୀ ମହାପାତ୍ର କହିଥିଲେ। ଯୁବରେଡକ୍ରସ ଉପଦେଷ୍ଟା ଅଧ୍ୟାପିକା ଟ୍ୱିଙ୍କିଲ ମିଶ୍ରଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମ ଶେଷରେ ଅଧ୍ୟାପିକା ସୂର୍ଯ୍ୟକାନ୍ତି ମହାପାତ୍ର କୋଭିଡ ପରିଚାଳନା ସଂପର୍କରେ ଆଲୋକପାତ କରିବା ସହ ଲକ୍ଷଣ ଦେଖାଦେବା କ୍ଷଣି ପରୀକ୍ଷା କରାଇବା ଜରୁରୀ ବୋଲି ମତବ୍ୟକ୍ତି କରିବା ସହ ଧନ୍ୟବାଦ ଅର୍ପଣ କରିଥିଲେ। ଯୁବରେଡକ୍ରସ ସ୍ୱେଚ୍ଛାସେବୀ ଛାତ୍ରୀମାନେ ଉପଦେଷ୍ଟା ଅଧ୍ୟାପିକା ଟ୍ୱିଙ୍କିଲ ମିଶ୍ରଙ୍କ ଦ୍ୱାରା ରଚିତ ଓ ନିର୍ଦ୍ଦେଶିତ ଏକ ସଚେତନଧର୍ମୀ ପଥପ୍ରାନ୍ତ ନାଟକ ପରିବେଷଣ କରିଥିଲେ।
Popular Categories
Previous article
Next article