ନୂଆଦିଲ୍ଲୀ : ବଲିଉଡ଼୍ ଅଭିନେତ୍ରୀ ସୁସ୍ମିତା ସେନ୍ ରବିବାର ବିଶ୍ୱସୁନ୍ଦରୀ-୧୯୯୫ ଚେଲ୍ସୀ ସ୍ମିଥ୍ଙ୍କ ମୃତ୍ୟୁରେ ଗଭୀର ଦୁଃଖ ପ୍ରକାଶ କରି ଟ୍ୱିଟର୍ ମାଧ୍ୟମରେ ତାଙ୍କ ଭାବ ପ୍ରକାଶ କରିଛନ୍ତି। ଲିଭର୍ କ୍ୟାନ୍ସର୍ ଯୋଗୁଁ ଶନିବାର ସ୍ମିଥ୍ଙ୍କର ମୃତ୍ୟୁ ହୋଇଛି। ମୃତ୍ୟୁ ସମୟରେ ତାଙ୍କୁ ୪୫ ବର୍ଷ ବୟସ ହୋଇଥିଲା। ୟୁଏସ୍ଏ ର ପ୍ରତିନିଧିତ୍ୱ କରି ଚେଲ୍ସୀ ସ୍ମିଥ୍ ୧୯୯୫ ମସିହାରେ ବିଶ୍ୱସୁନ୍ଦରୀ ର ମୁକୁଟ ପିନ୍ଧିଥିଲେ। ସୁସ୍ମିତା ଟ୍ୱିଟ୍ କରିଛନ୍ତି ଯେ, “ମୋତେ ତାଙ୍କ ହସ ଓ ପରିପକ୍ୱ ବ୍ୟକ୍ତିତ୍ୱ ବହୁତ ଭଲ ଲାଗେ। ମୋ ପ୍ରିୟ ବାନ୍ଧବୀଙ୍କ ଆତ୍ମାକୁ ଶାନ୍ତି ମିଳୁ”। ଏହା ସହ ସୁସ୍ମିତା ଏକ ଫଟୋ ମଧ୍ୟ ସେୟାର କରିଛନ୍ତି, ଯେଉଁଥିରେ ସେ ନିଜ ବିଶ୍ୱସୁନ୍ଦରୀର ମୁକୁଟ ଚେଲ୍ସୀ ସ୍ମିଥ୍ଙ୍କୁ ପିନ୍ଧାଉଥିବା ଦେଖିବାକୁ ମିଳିଛି। ସ୍ମିଥ୍ଙ୍କ ମୃତ୍ୟୁକୁ ନେଇ ସୁସ୍ମିତାଙ୍କ ସମେତ ବହୁ କଳାକାର ଶୋକ ପ୍ରକାଶ କରିଛନ୍ତି।
୧୯୯୫ ରେ ବିଶ୍ୱସୁନ୍ଦରୀ ହୋଇଥିବା ଚେଲ୍ସୀ ସ୍ମିଥ୍ଙ୍କୁ ସୁସ୍ମିତା ସେନ୍ ମୁକୁଟ ପିନ୍ଧାଇଥିଲେ। ସୁସ୍ମିତା ବିଶ୍ୱସୁନ୍ଦରୀ ପ୍ରତିଯୋଗୀତା ୧୯୯୪ର ବିଜେତା ଥିଲେ। ସ୍ମିଥ୍ ବହୁ ଟିଭି ଶୋ’ ଓ ଚଳଚ୍ଚିତ୍ରରେ ମଧ୍ୟ କାମ କରିଥିଲେ।
.