ଇସଲାମାବାଦ: ପାକିସ୍ତାନର ଦକ୍ଷିଣାଞ୍ଚଳରେ ଭୂକମ୍ପ ଅନୁଭୂତ ହେବା ଫଳରେ ଅନ୍ୟୂନ୨୦ ଜଣଙ୍କର ପ୍ରାଣହାନି ଘଟିଥିବା ଏଏଫପି ଖବର ସରବରାହ ସଂସ୍ଥା ସୂତ୍ରରୁ ଜଣାଯାଇଛି । ଦେଶର ବିପର୍ଯ୍ୟୟ ପରିଚାଳନା ଅଧିକାରୀଙ୍କ ସୂତ୍ରରୁ ଉଦ୍ଧାର କରି ଏହି ସଂସ୍ଥା କହିଛି ଯେ ମଙ୍ଗଳବାର ଦିନ ଭୋର ପ୍ରାୟ ୩.୩୦ରେ ପାକିସ୍ତାନର ହାରନାଇର ଉତ୍ତର ଓ ଉତ୍ତର ପୂର୍ବକୁ ୧୪ କିଲୋମିଟର ଦୂରରେ ଏହି ଭୂକମ୍ପ ଘଟିତ ହୋଇଥିଲା । ଏଥିରେ କେତେକ ଘରର ଛାତ ଓ କାନ୍ଥ ଭାଙ୍ଗିପଡିବାରୁ ବହୁ ଲୋକ ଆହତ ହୋଇଛନ୍ତି । ଏଥିରେ ମହିଳା ଓ ଶିଶୁଙ୍କ ସମେତ ପ୍ରାୟ ୨୦ ଜଣଙ୍କର ମୃତୁ୍ୟ ଘଟିଥିବା ଜଣାଯାଇଛି । ଭୂକମ୍ପର ମାତ୍ରା ରିକ୍ଟର ସ୍କେଲରେ ୬.୦ ଥିଲା । ଇତିମଧ୍ୟରେ ଭୂକମ୍ପ ପ୍ରଭାବିତ ଅଞ୍ଚଳରେ ଉଦ୍ଧାର କାର୍ଯ୍ୟକୁ ବ୍ୟାପକ କରାଯାଇଛି । ଭାଙ୍ଗିପଡିଥିବା ଘରଗୁଡିକ ତଳେ କେହି ଚାପି ହୋଇ ରହିଛନ୍ତି କି ନାହିଁ ତାହାକୁ ଅଗ୍ରାଧିକାର ଭିତ୍ତିରେ ଖୋଜାଯାଉଛି । ତେବେ କେତେକ ସ୍ଥାନକୁ ସଡକ ଯୋଗାଯୋଗ ଏବଂ ବିଦୁ୍ୟତ, ମୋବାଇଲ ସଂଯୋଗ ଭଳି ମୌଳିକ ସୁବିଧା ସୁଯୋଗ ନଥିବାରୁ ସେଠାରେ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହୋଇଥିବା ଜଣାଯାଇଛି । ଉଦ୍ଧାରକାରୀ ଦଳ ଟର୍ଚ୍ଚ ଲାଇଟ ଏବଂ ମୋବାଇଲ ଫ୍ଲାଶ ଲାଇଟ ସାହାଯ୍ୟରେ ସେଠାରେ ଉଦ୍ଧାର କାର୍ଯ୍ୟ କରୁଛନ୍ତି । ଅଧିକାଂଶ ଆହତଙ୍କର ଶରୀରର ବିଭିନ୍ନ ସ୍ଥାନରେ ଅସ୍ଥି ଭାଙ୍ଗି ଯାଇଥିବା ହାସପାତାଳଗୁଡିକ ସୂତ୍ରରୁ ଜାଣିବାକୁ ମିଳିଛି । ଆହତଙ୍କ ମଧ୍ୟରେ ଗୁରୁତର ଥିବା ୪୦ ଜଣଙ୍କୁ କ୍ୱେଟାକୁ ଆମ୍ବୁଲାନ୍ସ ଯୋଗେ ଅଧିକ ଚିକିତ୍ସା ପାଇଁ ପଠାଯାଇଛି ।
Popular Categories
Previous article
Next article