ନୀଳଗିରି: ବାଲେଶ୍ୱର ଜିଲାର ନୀଳଗିରିସ୍ଥିତ ପଞ୍ଚଲିଙ୍ଗେଶ୍ୱର ଶୈବପୀଠ ଅଞ୍ଚଳରୁ ସୋମବାର ରାତିରେ ଏକ ୧୩ ଫୁଟ ଲମ୍ବର ଅହିରାଜ ବା କିଙ୍ଗକୋବ୍ରା ସାପକୁ ଧରା ଯାଇଛି। ଏହି ବିଷଧର ସାପଟି ପଞ୍ଚଲିଙ୍ଗେଶ୍ୱର ପାର୍କିଂଷ୍ଟାଣ୍ଡ ନିକଟରେ ଥିବା ଏକ ଖେଳଣା ଦୋକାନ ଭିତରେ ପଶି ଗର୍ଜନ କରୁଥିଲା। ମୂଷା ସନ୍ଧାନରେ ଏହି ସାପଟି ଦୋକାନ ଭିତରକୁ ପଶି ଯାଇଥିବା କୁହାଯାଉଛି। ପଞ୍ଚଲିଙ୍ଗେଶ୍ୱରସ୍ଥିତ ପୁଲିସ ସହାୟତା କେନ୍ଦ୍ର ପାଖରେ ଉକ୍ତ ସାପଟି ବିଚରଣ କରୁଥିବା ସମୟରେ ଡ୍ୟୁଟିରେ ଥିବା ପୁଲିସ କର୍ମଚାରୀମାନେ ଦେଖିବାକୁ ପାଇଥିଲେ।
ଖବରପାଇ ସ୍ଥାନୀୟ ଅଞ୍ଚଳର ମନୋରଞ୍ଜନ ଦାସ, ନୀଳଗିରି ଅଞ୍ଚଳର ଗୟାଧର ବେହେରା, ସୁଶାନ୍ତ ମହାପାତ୍ର, ସୌମ୍ୟକାନ୍ତ ପ୍ରଧାନ ପ୍ରମୁଖ ସେଠାରେ ପହଞ୍ଚି ଏହି ବିରାଟ ସାପଟିକୁ କୌଶଳ କ୍ରମେ କାବୁ କରିଛନ୍ତି। ପରେ ଏହି ସାପଟିକୁ ପଞ୍ଚଲିଙ୍ଗେଶ୍ୱର ଜଙ୍ଗଲରେ ଛାଡ଼ି ଦିଆଯାଇଛି। ତେବେ ପଞ୍ଚଲିଙ୍ଗେଶ୍ୱର ଅଞ୍ଚଳଟି ପାହାଡ଼ ପର୍ବତ ଘେରା ହୋଇଥିବା ଯୋଗୁ ସ୍ଥାନୀୟ ଦେବଗିରି ପାହାଡ଼ାରେ ବହୁ ବିଷଧର ସାପ ଭରି ରହିଥିବା କୁହାଯାଏ।
