ଚଳିତ ମାସ ୧୧ ତାରିଖରୁ ଆସନ୍ତାକାଲି ପର୍ଯ୍ୟନ୍ତ ଟିକା ଉତ୍ସବ ପାଳନ କରିବା ପାଇଁ ପ୍ରଧାନମନ୍ତ୍ରୀଙ୍କ ଆହ୍ୱାନ ଦୃଷ୍ଟିରୁ ଦେଶରେ କୋଭିଡ ଟିକାକରଣ ପ୍ରକ୍ରିୟା ଅତି ମାତ୍ରାରେ ତ୍ୱରାନ୍ୱିତ ହୋଇଛି। ଗତକାଲି ଦ୍ୱିତୀୟ ଦିନରେ ସନ୍ଧ୍ୟା ୮ଟା ସୁଦ୍ଧା ୪୦ ଲକ୍ଷ ଲୋକ ଟିକା ନେଇଛନ୍ତି। ଗତକାଲି ଟିକାଦାନ କେନ୍ଦ୍ର ସଂଖ୍ୟା ମଧ୍ୟ ୪୫ ହଜାରରୁ ୭୧ ହଜାରକୁ ବୃଦ୍ଧି ପାଇଥିଲା। ଗୋଟିଏ ଦିନରେ ୨୬ ହଜାର ଟିକାଦାନ କେନ୍ଦ୍ର ବୃଦ୍ଧି ପାଇବା ଏକ ଉଲ୍ଲେଖନୀୟ ଘଟଣା। ଅନେକ ସ୍ଥାନରେ କର୍ମସ୍ଥଳୀଗୁଡିକରେ ବହୁସଂଖ୍ୟକ ହିତାଧିକାରୀ ଟିକା ନେଇଛନ୍ତି।
ବର୍ତ୍ତମାନ ସୁଦ୍ଧା ୧୦ କୋଟି ୮୫ ଲକ୍ଷ ୧୨ ହଜାର ୩୮୨ ଜଣ ଲୋକ ଟିକା ନେଇସାରିଲେଣି। ଚଳିତ ମାସ ପହିଲାରୁ ଟିକାଦାନ ପରିସର ବୃଦ୍ଧି କରାଯାଇ ୪୫ ବର୍ଷରୁ ଊର୍ଦ୍ଧ୍ବ ସମସ୍ତଙ୍କୁ ଟିକା ଦିଆଯାଉଛି। ମାତ୍ର ଏହି ଅଳ୍ପ ସମୟ ଭିତରେ ୪୫ ବର୍ଷରୁ ଊର୍ଦ୍ଧ୍ବ ୭ କୋଟି ୬୦ ଲକ୍ଷ ଲୋକଙ୍କୁ ପ୍ରଥମ ଡୋଜ ଟିକା ଦିଆଯାଇଥିବା ବେଳେ ୩୦ ଲକ୍ଷ ଲୋକଙ୍କୁ ସମ୍ପୂର୍ଣ୍ଣ ଟିକାକରଣ କରାଯାଇଛି।
