ଟିଟିଲାଗଡ : ଟିଟିଲାଗଡ ସହରର ଏକ ସରକାରୀ କାର୍ଯ୍ୟାଳୟରେ କାର୍ଯ୍ୟରତ ଜଣେ କର୍ମଚାରୀଙ୍କ ନାବାଳିକା ଝିଅର ବିବାହ ଉଦ୍ୟମକୁ ସୋମବାର ଚାଇଲ୍ଡ ଲାଇନ ଏବଂ ଆଇସିଡିଏସ ବିଭାଗର ମିଳିତ ଉଦ୍ୟମ କ୍ରମେ ରୋକା ଯାଇପାରିଛି। ଏନେଇ ଟିଟିଲାଗଡ ଚାଇଲ୍ଡ ଲାଇନ ସଦସ୍ୟ ଶିବାନନ୍ଦ ବେହେରାଙ୍କ ସୂଚନା ମତେ ଭବାନୀପାଟଣା ଥାନା ଅନ୍ତର୍ଗତ ଲଟକାବାହାଲିରେ ଜଣେ ଯୁବକଙ୍କ ବିବାହ ସ୍ଥିର ହୋଇଥିଲା। ତେବେ କନ୍ୟା ଅନ୍ୟ ପିଲା ସହ ଫେରାର ମାରିବା ନେଇ ଟିଟିଲାଗଡ ଅଞ୍ଚଳର ନାବାଳିକା ସହ ଜବରଦସ୍ତ ବିବାହ ପାଇଁ ଉଦ୍ୟମ ଚାଲିଥିଲା। ଏଥିରେ ନାବାଳିକାର ପିତା ଏବଂ ସାବତ ମାଆ ସାମିଲ ଥିଲେ। ଏପରିକି ନାବାଳିକାଙ୍କ ଆଜି ସ୍କୁଲରେ ପରୀକ୍ଷା ଥିବା ବେଳେ ମାରପିଟ କରି ସେଠାକୁ ନେଇ ଶତାଧିକ କୁଣିଆ ତଥା ଗ୍ରାମବାସୀଙ୍କ ଉପସ୍ଥିତିରେ ବିବାହ ଉଦ୍ୟମ କରାଯାଇଥିଲା। ଖବର ପାଇ ଟିଟିଲାଗଡ ସିଡିପିଓ ମୃଣ୍ମୟୀ ଭୋଇ, ସୁପରଭାଇଜର ମଞ୍ଜୁଲତା ପାଢୀ, ସୁଲୋଚନା ମହାନନ୍ଦ ଏବଂ ଚାଇଲ୍ଡ ଲାଇନ ସଦସ୍ୟ ଉକ୍ତ ଗ୍ରାମକୁ ପହଞ୍ଚିଥିଲେ। ଭବାନୀପାଟଣା ଜିଲା ସମାଜ କଲ୍ୟାଣ ଅଧିକାରୀ ଜ୍ୟୋର୍ତିମୟୀ ଜ୍ୟୋସ୍ନାରାଣୀ ପାତ୍ର, ଡିସିପିଓ କାଉନସିଲର ଅଂଶୁମାନ ବାବୁ, କେନ୍ଦ୍ରୀୟ ସଂଯୋଜକ କରିସ୍ମା ଦେବୀ, କେସିଙ୍ଗା ସିଡିପିଓ ମୁଜିବୁଲ ନେସା, ଚାଇଲ୍ଡ ଲାଇନ ସଦସ୍ୟ ସୁବାଶ ନାୟକ, ମହେନ୍ଦ୍ର ଚାଲାଣ ତଥା ସ୍ଥାନୀୟ ପୁଲିସଙ୍କ ସହାୟତାରେ ଗ୍ରାମରେ ପହଞ୍ଚି ବିବାହକୁ ରୋକିଥିଲେ। ତେବେ ସେଠାରୁ କୌଶଳକ୍ରମେ ନାବାଳିକାଙ୍କୁ ତାଙ୍କ ପିତା ଟିଟିଲାଗଡକୁ ନେଇ ଆସିଥିବା ଜଣାଯାଇଛି। ତେବେ ଟିଟିଲାଗଡ ଆଇସିଡିଏସ କର୍ମଚାରୀ ନାବାଳିକାକୁ ଠାବ କରିଥିବା ଜଣାଯାଇଛି। ଏନେଇ ବଲାଙ୍ଗିର ସିଡବ୍ଲୁସିଙ୍କ ପରାମର୍ଶ କ୍ରମେ ବ୍ୟବସ୍ଥା କରାଯିବ ବୋଲି ସିଡବ୍ଲୁସି ସଦସ୍ୟ ଶ୍ରୀ ବେହେରା କହିଛନ୍ତି।
Comments are closed.