ଜେନେଭା : ଦ୍ୱିତୀୟ ବିଶ୍ୱଯୁଦ୍ଧ ଅମଳର ଏକ ବିମାନ ସୁଇଜର ଲାଣ୍ଡର ପିଜ୍ ସେଗନାସ୍ ପର୍ବତ ଉପରେ ଦୁର୍ଘଟଣାଗ୍ରସ୍ତ ହେବା ଫଳରେ ଅନ୍ୟୂନ ୨୦ଜଣଙ୍କର ପ୍ରାଣହାନି ଘଟିଛି। ସୁଇଜରଲାଣ୍ଡ ବିମାନ ବାହିନୀ ସହିତ ସମ୍ପୃକ୍ତ ‘ଜେୟୁ ଏୟାର’ ମାଲିକାନାରେ ଥିବା ଏହି ଜଙ୍କର ଜେୟୁ-୫୨ ଏଚ୍ବି-ଏଚ୍ଓଟି ବିମାନ ୧୯୩୯ରେ ଜର୍ମାନୀରେ ନିର୍ମାଣ ହୋଇଥିଲା। ଶନିବାର ଅପରାହ୍ଣରେ ଏହି ବିମାନ ୧୭ଜଣ ଯାତ୍ରୀ ଓ ତିନିଜଣ କର୍ମଚାରୀଙ୍କୁ ନେଇ ଅଢ଼େଇ ହଜାର ମିଟର ଉଚ୍ଚ ସେଗନାସ୍ ପର୍ବତ ଉପରେ ଉଡ଼ୁଥିବାବେଳେ ଦୁର୍ଘଟଣାଗ୍ରସ୍ତ ହୋଇଥିଲା। ଏହି ବିମାନ ଟିସିନୋରୁ ଡୁଏବେନ୍ଡର୍ଫ ବିମାନ ଘାଟି ଅଭିମୁଖେ ଯାଉଥିଲାବେଳେ ଏଥିରେ କୌଣସି କାରଣରୁ ବିସ୍ଫୋରଣ ଘଟିଥିଲା। ରବିବାର ସକାଳେ ଏ ସମ୍ପର୍କରେ ଖବର ମିଳିବା ପରେ ୫ଟି ହେଲିକପ୍ଟର ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ବିମାନରେ ଥିବା ସମସ୍ତଙ୍କର ମୃତ୍ୟୁ ଘଟିଥିବା ଉଦ୍ଧାରକାରୀ ଦଳ ସୂଚନା ଦେଇଛନ୍ତି। ସମସ୍ତ ମୃତକ ପାରିବାରିକ ବନ୍ଧୁ ବୋଲି ଜଣାପଡ଼ିଛି। ସେହିପରି ଶନିବାର ଏକ ସ୍ୱିସ୍ ପର୍ଯ୍ୟଟକ ବିମାନ ନିଡୱାଲ୍ଡ ଜଙ୍ଗଲରେ ଦୁର୍ଘଟଣାଗ୍ରସ୍ତ ହେବା ଫଳରେ ଏକ ଦମ୍ପତି ଓ ତାଙ୍କର ଦୁଇ ସନ୍ତାନଙ୍କର ମୃତ୍ୟୁ ଘଟିଛି।
