ଭାରତ-ଅଷ୍ଟ୍ରେଲିଆ ଏବଂ ଶ୍ରୀଲଙ୍କା-ଇଂଲଣ୍ଡ ମଧ୍ୟରେ ଟେଷ୍ଟ ସିରିଜ ଶେଷ ହେବା ପରେ ଆଇସିସି ପକ୍ଷରୁ ଟେଷ୍ଟ ରାଙ୍କିଙ୍ଗ ଜାରି କରାଯାଇଛି। ଅଷ୍ଟ୍ରେଲିଆ ବିପକ୍ଷ ୪ର୍ଥ ଟେଷ୍ଟରେ ଦ୍ରୁତ ୮୯ ରନ୍ କରି ମ୍ୟାନ୍ ଅଫ ଦ ମ୍ୟାଚ ବିବେଚିତ ଭାରତୀୟ ବ୍ୟାଟ୍ସମ୍ୟାନ ଋଷଭ ପନ୍ତ ଏକା ଥରକେ ୧୩ଟି ସ୍ଥାନ ଉପରକୁ ଉଠି ୬୯୧ ପଏଣ୍ଟ ସହିତ ୧୩ ତମ ସ୍ଥାନରେ ପହଞ୍ଚିଛନ୍ତି। ଏହା ସହିତ ପନ୍ତ ବିଶ୍ଵରେ ସର୍ବାଧିକ ରାଙ୍କିଙ୍ଗ ପ୍ରାପ୍ତ ୱିକେଟ୍ କିପର ବ୍ୟାଟ୍ସମ୍ୟାନ ହୋଇଛନ୍ତି।
ରାଙ୍କିଙ୍ଗ୍ରେ ପ୍ରଥମ ସ୍ଥାନରେ କେନ୍ ୱିଲିୟମସନ୍ (୯୧୯ ପଏଣ୍ଟ) ଏବଂ ୨ୟ ସ୍ଥାନରେ ଷ୍ଟିଭ୍ ସ୍ମିଥ (୮୯୧ ପଏଣ୍ଟ) ରହିଛନ୍ତି। ବ୍ରିସବେନ୍ ଟେଷ୍ଟରେ ଶତକ ହାସଲ କରିଥିବା ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ମାର୍ନସ ଲାବୁଶେନ (୮୭୮ ପଏଣ୍ଟ) ଗୋଟିଏ ସ୍ଥାନ ଉପରକୁ ଉଠି ୩ୟ ସ୍ଥାନରେ ପହଞ୍ଚିଛନ୍ତି। ଫଳରେ ବିରାଟ କୋହଲି (୮୬୨ ପଏଣ୍ଟ) ଗୋଟିଏ ସ୍ଥାନ ତଳକୁ ଖସି ୪ର୍ଥ ସ୍ଥାନରେ ପହଞ୍ଚିଛନ୍ତି।
After the conclusion of the first #SLvENG Test and the Gabba clash, bowlers sizzle in the latest @MRFWorldwide ICC Test Player Rankings!
Full rankings: https://t.co/OMjjVx5Mgf pic.twitter.com/kFhr7oltIQ
— ICC (@ICC) January 20, 2021
ଶ୍ରୀଲଙ୍କା ବିପକ୍ଷରେ ଦ୍ବିଶତକ ହାସଲ କରିଥିବା ଇଂଲଣ୍ଡ ଅଧିନାୟକ ଜୋ ରୁଟ୍ (୭୮୩) ଟପ୍ ୧୦ରେ ପହଞ୍ଚିଛନ୍ତି। ସେ ୫ମ ସ୍ଥାନରେ ରହିଛନ୍ତି। ସେହିପରି ଭାରତୀୟ ବ୍ୟାଟ୍ସମ୍ୟାନ ଚେତେଶ୍ଵର ପୂଜାରା (୭୬୦) ଗୋଟିଏ ସ୍ଥାନ ଉପରକୁ ଉଠି ୭ମରେ ଥିବାବେଳେ ଆଜିଙ୍କ୍ୟ ରାହାଣେ (୭୪୮) ୨ଟି ସ୍ଥାନ ତଳକୁ ଖସି ୯ମ ସ୍ଥାନରେ ରହିଛନ୍ତି। ରୋହିତ ଶର୍ମା ୧୮ ତମ ସ୍ଥାନରେ ରହିଛନ୍ତି।
ବୋଲିଂ ରାଙ୍କିଙ୍ଗରେ ପ୍ୟାଟ୍ କ୍ୟୁମିନ୍ସ ୯୦୮ ପଏଣ୍ଟ ସହିତ ପ୍ରଥମ ସ୍ଥାନରେ ଥିବାବେଳେ ଷ୍ଟୁଆର୍ଟ ବ୍ରୋଡ୍ ୮୪୭ ପଏଣ୍ଟ ସହିତ ୨ୟରେ ରହିଛନ୍ତି। ସେହିପରି ନିଲ୍ ୱାଗନର ୮୨୫ ପଏଣ୍ଟ ସହିତ ୩ୟ, ଜୋଶ ହାଜେଲଉଡ୍ (୮୧୬ ପଏଣ୍ଟ) ୪ର୍ଥ ଏବଂ ଟିମ ସୌଦି (୮୧୧ ପଏଣ୍ଟ) ୫ମ ସ୍ଥାନରେ ପହଞ୍ଚିଛନ୍ତି।
