ଭୁବନେଶ୍ବର ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗରେ ସଂସ୍କାର ପାଇଁ ବିଭାଗୀୟ ଅଧିକାରୀ ପଦକ୍ଷେପ ନେଉଛନ୍ତି। ହେଲେ ସଂସ୍କୃତି ଭବନ ସାମ୍ନା ଫାଟକ ବନ୍ଦ ରହିଥିବାବେଳେ ଏଠାରେ ଦେଖାଦେଉଥିବା ଅବ୍ୟବସ୍ଥା ବିଭାଗର ଅପସଂସ୍କୃତିକୁ ପଦାରେ ପକାଇଛି। ଫାଟକ ନିକଟରେ ଲୋକେ ଶୌଚ କରୁଥିବା ବେଳେ ଦୁର୍ଗନ୍ଧରେ ନାକ ଫାଟିପଡୁଛି। ଏହାସହିତ ଆବର୍ଜନା ଗଦା ହୋଇ ରହୁଥିବା ଯୋଗୁଁ ସୌନ୍ଦର୍ଯ୍ୟ ମଧ୍ୟ ହାନି ହେଉଛି।
ଗୋଟିଏ ପଟେ ଭୁବନେଶ୍ବର ମହାନଗର ନିଗମ ପକ୍ଷରୁ ବାହ୍ୟ ମଳମୁକ୍ତ ପାଇଁ ପଦେକ୍ଷପ ନିଆଯାଉଛି। ବୈଠକ ସହିତ ପଦକ୍ଷେପ ଗ୍ରହଣ କରାଯାଉଛି। ହେଲେ ଦୀପ ତଳ ଅନ୍ଧାର ଭଳି ବିଏମ୍ସି କାର୍ଯ୍ୟାଳୟରୁ ମାତ୍ର ୨୦୦ ମିଟରେ ଦୂରରେ ଥିବା ସଂସ୍କୃତି ଭବନ ମୁଖ୍ୟ ଫାଟକ ଉପରେ ଦୃଷ୍ଟି ପଡୁନାହିଁ। ଗୁରୁତ୍ବପୂର୍ଣ୍ଣ କଥା ହେଲା ଏଠାରେ ଏକ ଶୌଚାଳୟ ରହିଛି। ଉଭୟ ମହିଳା ଏବଂ ପୁରୁଷଙ୍କ ପାଇଁ ସମସ୍ତ ବ୍ୟବସ୍ଥା କରାଯାଇଛି। ହେଲେ ଏଠାରେ ବସବାସ କରୁଥିବା କିଛି ଲୋକ ଏହି େଶୗଚାଳୟକୁ ବ୍ୟବହାର କରୁନଥିବା ଦେଖିବାକୁ ମିଳିଛି। ଅବଶ୍ୟ ଭୁବନେଶ୍ବର ମହାନଗର ନିଗମ ପକ୍ଷରୁ ମଝିରେ ମଝିରେ ସଫେଇ କରାଯାଉଛି କିନ୍ତୁ ତାହା ଯଥେଷ୍ଟ ନୁହେଁ। ଏହାସହିତ ରାସ୍ତାକଡ଼ରେ ଆବର୍ଜନା ଗଦା ହୋଇ ରହୁଥିବା ଯୋଗୁଁ ଯାତାୟାତ କରିବାରେ ଅସୁବିଧା ହେବା ସହିତ ଦୁର୍ଗନ୍ଧ ହେଉଛି। ଏହି ରାସ୍ତା ଦେଇ ଛାତ୍ରଛାତ୍ରୀଙ୍କ ସହିତ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟାଳୟକୁ କର୍ମଚାରୀ ଯାଉଥିବାବେଳେ ନାକ ଟେକୁଛନ୍ତି। ନିକଟରେ ସଂସ୍କୃତି ଭବନ ରହିଥିଲେ ହେଁ ଏହି ଅବ୍ୟବସ୍ଥା ନେଇ ଦିନେ ହେଲେ ପ୍ରତିବାଦ ହୋଇନାହିଁ। ଯେହେତୁ ମୁଖ୍ୟ ଫାଟକ ବନ୍ଦ ରହିଛି ସେଥିପାଇଁ କର୍ତ୍ତୃପକ୍ଷ ପଦକ୍ଷେପ ନେଇନଥିବା ଜଣାପଡ଼ିଛି।
ଏନେଇ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ କହିଛନ୍ତି,ଏ ବିଷୟରେ ତଦାରଖ କରାଯିବା ସହିତ ଭୁବନେଶ୍ବର ମହାନଗର ନିଗମ କର୍ତ୍ତୃପକ୍ଷଙ୍କୁ ଅବଗତ କରାଯିବ।
