ବିନିକା: ବିନିକା ଥାନା ଗଣିଆଁ ପୁଲିସ ଫାଣ୍ଡି ଅଧିନସ୍ତ ମେଘଲା ଗାଁର ୨ ଜଣ ନାବାଳକ ଟ୍ରାକ୍ଟରରେ ଖଞ୍ଜା ଯାଇଥିବା ଧାନକଟା(ଥ୍ରେସର)ମେସିନ ଭାରସାମ୍ୟ ହରାଇ ଓଲଟି ପଡିବାରୁ ସେହି ମେସିନ ତଳେ ଚାପିହୋଇ ଜଣେ ନାବାଳକର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ଅନ୍ୟ ଜଣେ ନାବାଳକ ଗୁରୁତର ଆହତ ହୋଇଥିବା ଜଣାପଡ଼ିଛି। ଆହତ ନାବାଳକକୁ ବିନିକା ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ତାକୁ ବୁର୍ଲା ବଡ଼ ମେଡ଼ିକାଲକୁ ସ୍ଥାନାନ୍ତରିତ କରା ଯାଇଛି।
ଘଟଣାରୁ ପ୍ରକାଶ ଯେ, ଆଜି ସକାଳେ ଧାନକଟିବା ପାଇଁ ଟ୍ରାକ୍ଟର ସଂଯୁକ୍ତ ହୋଇ ଉକ୍ତ ଥ୍ରେସର ମେସିନ ମେଘଲା ଗ୍ରାମରୁ ପଧାନପାଲି ମୌଜାକୁ ଏକ ଜମିକୁ ଯାଉଥିଲା। ତେବେ ରାସ୍ତା ପାର୍ଶ୍ବରେ ଛିଡ଼ା ହୋଇଥିବା ଜଣେ (୧୦) ବର୍ଷିୟ ନାବାଳକ ଓ ଅନ୍ୟ ଜଣେ (୧୪) ବର୍ଷିୟ ନାବାଳକ ଉଭୟଙ୍କ ଉପରେ ଥ୍ରେସର ମେସିନ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଘଟଣାସ୍ଥଳରେ ଦଶ ବର୍ଷିଆ ନାବାଳକ ଜଣକର ମୃତ୍ୟୁ ଘଟି ଯାଇଥିବା ବେଳେ ଏହି ଘଟଣାରେ ଅନ୍ୟ ଜଣେ ଚଉଦ ବର୍ଷର ନାବାଳକ ଜଣକ ଗୁରୁତର ଆହତ ହୋଇ ଥିବାରୁ ତାକୁ ବିନିକା ଡାକ୍ତରଖାନାରୁ ବୁର୍ଲା ବଡ଼ ମେଡ଼ିକାଲକୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି।
