ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ବୁଧବାର ଦେଶରେ ଗଣଟୀକାକରଣ ନିର୍ଦେଶ ଦେଇଛନ୍ତି । ଆସନ୍ତା ସପ୍ତାହରୁ ଏହି ଟୀକାକରଣ କାର୍ଯ୍ୟକ୍ରମ ଆରମ୍ଭ ହେବ । ରଏଟର ସୂତ୍ରରୁ ମିଳିଥିବା ସୂଚନା ଅନୁସାରେ ବ୍ରିଟେନ କରୋନା ଭାଇରସ୍ ପ୍ରତିରୋଧୀ ଫାଇଜର ଟୀକାକୁ ଆସନ୍ତା ସପ୍ତାହରେ ଆରମ୍ଭ କରିବାକୁ ଅନୁମୋଦନ କରିବା ସଙ୍ଗେସଙ୍ଗେ ରୁଷ ରାଷ୍ଟ୍ରପତି ଦେଶରେ ସ୍ପୁଟନିକ-୫ ଟୀକାକୁ ସାର୍ବଜନୀନ କରିବାକୁ ନିର୍ଦେଶ ଦେଇଛନ୍ତି ।
ଚଳିତ ବର୍ଷ ଅଗଷ୍ଟରେ ରୁଷ ବିଶ୍ବର ପ୍ରଥମ ଦେଶ ଭାବରେ କରୋନାଭାଇରସ୍ ମୁକାବିଲା ନିମନ୍ତେ ସ୍ବଦେଶ ନିର୍ମିତ ସ୍ପୁଟନିକ୍-ଭି ଟୀକାକୁ ଅନୁମୋଦନ କରିଥିଲା । ତେବେ ଦେଶ ପ୍ରସ୍ତୁତ ସ୍ପୁଟନିକ୍ -ଭି ଓ ବ୍ରିଟିଶ୍ ପ୍ରସ୍ତୁତ ଫାଇଜର କେତେ ପରିମାଣରେ ଦିଆଯିବ ତାହା ସ୍ପଷ୍ଟ ହୋଇନାହିଁ ।
ଗତ ୨୪ ଘଣ୍ଟା ମଧ୍ୟରେ ରୁଷରେ ୨୬୪୦୨ ଜଣ କରୋନା ସଂକ୍ରମିତ ହୋଇଛନ୍ତି ଓ ମୋଟ ସଂକ୍ରମିତଙ୍କ ସଂଖ୍ୟା ୨୩.୨୨ ଲକ୍ଷ ପହଞ୍ଚିଛି । ସେହିପରି କେବଳ ରାଜଧାନୀ ମସ୍କୋରେ ଗତକାଲି ଗୋଟିଏ ଦିନରେ ୫୬୨୪ ଜଣ ସଂକ୍ରମିତ ହୋଇଛନ୍ତି ଓ ମୋଟ ରୋଗୀଙ୍କ ସଂଖ୍ୟା ୬.୧୨ ଲକ୍ଷ ଅତିକ୍ରମ କରିଥିବା ସୂଚନା ମିଳିଛି ।
କରୋନା ମହାମାରୀ ଆରମ୍ଭରୁ ରୁଷରେ ମୋଟ ୪୦୪୬୪ ଜଣ ମୃତ୍ୟୁ ବରଣ କରିଛନ୍ତି । ସମୁଦାୟ ସଂକ୍ରମଣକୁ ଦେଖିଲେ ରୁଷ ୟୁରୋପରେ ପ୍ରଥମସ୍ଥାନରେ ରହିଛି ଏବଂ ବିଶ୍ବସ୍ତରରେ ୪ର୍ଥ ସ୍ଥାନ ଅଧିକାର କରିଛି । ଏହି ପରିପ୍ରେକ୍ଷୀରେ ରାଷ୍ଟ୍ରପତି ପୁଟିନ୍ ଦେଶରେ କରୋନା ଟୀକାର ଗଣ ଟୀକାକରଣ ଲାଗି ନିର୍ଦେଶ ଦେବା ପରେ ଲୋକମାନେ ଉତ୍ସାହିତ ହୋଇଛନ୍ତି ।
