ଆଠଗଡ : ପବିତ୍ର କାର୍ତ୍ତିକ ପୂର୍ଣ୍ଣିମା ଅବସରରେ ରାଜରାଜେଶ୍ୱର ବେଶରେ ଦର୍ଶନ ଦେଲେ ଆଠଗଡର ଆରାଧ୍ୟ ପ୍ରଭୁ ଶ୍ରୀ ଅଟ୍ଟାଳି ଜଗନ୍ନାଥ ଦେବ। ଏହି ବେଶ ପାଇଁ ସାଧାରଣତଃ ହୀରା, ନୀଳା ଖଚିତ ସ୍ୱର୍ଣ୍ଣ ଅଳଙ୍କାର ପ୍ରଭୁଙ୍କ ଶ୍ରୀ ଅଙ୍ଗରେ ଲାଗି କରାଯାଇଥାଏ। ରାଜାମାନଙ୍କର ରାଜା ହୋଇଥିବାରୁ ମହାପ୍ରଭୁ ଶ୍ରୀ ଜଗନ୍ନାଥ ରାଜା ପିନ୍ଧୁଥିବା ସ୍ୱର୍ଣ୍ଣ ଅଳଙ୍କାରଠାରୁ ମହାପ୍ରଭୁଙ୍କ ଶ୍ରୀ ଅଙ୍ଗରେ ତାଠାରୁ ଅଧିକ ସ୍ୱର୍ଣ୍ଣ ଅଳଙ୍କାର ଲାଗି ହୋଇଥାଏ ବୋଲି କଥିତ ଅଛି। ତେବେ ଏହି ପରମ୍ପରାକୁ ବଜାୟ ରଖିବା ଲାଗି ଆଠଗଡର ଆରାଧ୍ୟ ପ୍ରଭୁ ଶ୍ରୀ ଅଟ୍ଟାଳି ଜଗନ୍ନାଥଙ୍କୁ ଆଜି କାର୍ତ୍ତିକ ପୂର୍ଣ୍ଣିମା ତିଥିରେ ରାଜରାଜେଶ୍ୱର ବେଶରେ ସଜ୍ଜିତ କରାଯିବା ସହ ସ୍ୱତନ୍ତ୍ର ନୀତିକାନ୍ତି ସଂପନ୍ନ ହୋଇଥିଲା। ପ୍ରତ୍ୟୁଷରେ ପହଡ ଖୋଲା ନୀତି ପରେ ପରେ ମଙ୍ଗଳ ଆଳତୀ, ମଇଲମ ଲାଗି, ତଡପ ଲାଗି ଓ ଅବକାଶ ନୀତି ବଡପଣ୍ଡା ଶରତ କୁମାର ପଣ୍ଡାଙ୍କ ଦ୍ୱାରା ସଂପନ୍ନ ହୋଇଥିଲା। ତଦ୍ପରେ ଶ୍ରୀ ଜୀଉଙ୍କୁ ରାଜରାଜେଶ୍ୱର ବେଶରେ ସଜ୍ଜିତ କରାଯାଇ ସାଧାରଣ ଦର୍ଶନ ପାଇଁ ଦ୍ୱାର ଉନ୍ମୁକ୍ତ କରାଯାଇଥିଲା। ରାଜପୁରୋହିତ ସୁଶାନ୍ତ କୁମାର ମିଶ୍ର, ପୂଜକ ସୁଶାନ୍ତ ପଣ୍ଡା, ସ୍ୱାଗତ କୁମାର ପଣ୍ଡା, ସେବାୟତ ଆକୁଳ ରଣା ଓ ରବି ହରିଚନ୍ଦନ ପ୍ରମୁଖ ନୀତିକାନ୍ତି ସଂପନ୍ନ କରିବାରେ ସହଯୋଗ କରିଥିଲେ।
Comments are closed.