ଗଞ୍ଜାମ ଜିଲାର ହାତୀଓଟା ଓ ବଲାଙ୍ଗୀର ଜିଲାର ପଥର ଚେପା ଆଦର୍ଶ ବିଦ୍ୟାଳୟ ରାଜ୍ୟ ପାଇଁ ଆଣିଛନ୍ତି ଗୌରବ । ଦେଶର ଶ୍ରେଷ୍ଠ ୫ ସରକାରୀ ସ୍କୁଲ ମଧ୍ୟରେ ଓଡ଼ିଶାର ଏହି ଦୁଇଟି ବିଦ୍ୟାଳୟ ସ୍ଥାନ ପାଇଛନ୍ତି । ହାତୀଓଟ ସରକାରୀ ସ୍କୁଲ ବର୍ଗରେ ୫ମ ସ୍ଥାନ ଓ ପଥର ଚେପା ସରକାରୀ ଆବାସିକ ସ୍କୁଲ ବର୍ଗରେ ୫ମ ସ୍ଥାନ ପାଇଛନ୍ତି । ଉଲ୍ଲେଖଯୋଗ୍ୟ ଯେ ରାଜ୍ୟର ପ୍ରତ୍ୟେକ ବ୍ଲକରେ ଗୁଣାତ୍ମକ ଇଂରାଜୀ ମାଧ୍ୟମ ସିବିଏସ୍ଇ ବିଦ୍ୟାଳୟ ଯୋଗାଇବା ପାଇଁ ଓଡ଼ିଶା ଆଦର୍ଶ ବିଦ୍ୟାଳୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କର ଏକ ମହତ୍ୱପୂର୍ଣ୍ଣ ଯୋଜନା।
ରାଜ୍ୟର ଛାତ୍ରଛାତ୍ରୀଙ୍କୁ ଗୁଣାତ୍ମକ ଶିକ୍ଷା ସୁନିଶ୍ଚିତ କରିବା କ୍ଷେତ୍ରରେ ଅଗ୍ରଣୀ ‘ଓଡ଼ିଶା ଆଦର୍ଶ ବିଦ୍ୟାଳୟ’ ସର୍ବଭାରତୀୟ ସ୍କୁଲ ରାଙ୍କିଙ୍ଗ୍ସ ୨୦୨୦ର ଶ୍ରେଷ୍ଠ ବିଦ୍ୟାଳୟମାନଙ୍କ ମଧ୍ୟରେ ସ୍ଥାନ ପାଇଛି। ଅତ୍ୟାଧୁନିକ ଶିକ୍ଷା ଭିତ୍ତିଭୂମି ବିକାଶ ସହ ଶିକ୍ଷାର ମାନ ବୃଦ୍ଧି କରି ଓଡ଼ିଶା ସମଗ୍ର ଦେଶରେ ନୂଆ ଆଦର୍ଶ ସୃଷ୍ଟି କରିଛି। pic.twitter.com/Z58sqRDPn8
— CMO Odisha (@CMO_Odisha) November 11, 2020
ସରକାରୀ ସ୍କୁଲ ବର୍ଗରେ ରାଜ୍ୟର ଦୁଇ ସ୍କୁଲ ସ୍ଥାନ ପାଇବାକୁ ନେଇ ମୁଖ୍ୟମନ୍ତ୍ରୀ ଖୁସି ବ୍ୟକ୍ତ କରିବା ସହ ଟ୍ବିଟ୍ କରି ଉଭୟ ବିଦ୍ୟାଳୟର ଛାତ୍ର, ଶିକ୍ଷକ ଓ କର୍ମଚାରୀଙ୍କୁ ଅଭିନନ୍ଦନ ଜଣାଇଛନ୍ତି। ମୁଖ୍ୟମନ୍ତ୍ରୀ ଟ୍ୱିଟ୍ରେ ଲେଖିଛନ୍ତି ଯେ ଶିକ୍ଷାର ଶକ୍ତି ସହିତ ପ୍ରତ୍ୟେକ ପିଲାଙ୍କୁ ସଶକ୍ତ କରିବା ଆମର ମିଶନକୁ ଜାତୀୟ ସ୍ତରରେ ପ୍ରଶଂସା କରାଯାଇଛି।
ସୂଚନାଯୋଗ୍ୟ ଯେ ଏକ ଶିକ୍ଷା ପତ୍ରିକା ଦ୍ବାରା କରାଯାଇଥିବା ସର୍ବେକ୍ଷଣରେ ୧୧୩୬୮ ଜଣଙ୍କ ମତାମତ ନିଆଯାଇଥିଲା । ଏଥିରେ ସାରା ଭାରତରେ ଶିକ୍ଷାଞ୍ଚଳର ବିଦ୍ୟାଳୟ ପ୍ରଧାନଶିକ୍ଷକ, ଶିକ୍ଷକ, ୨୮ଟି ପ୍ରମୁଖ ସହରରେ ପିତାମାତା ଏବଂ ବିଦ୍ୟାଳୟର ଛାତ୍ରଛାତ୍ରୀଙ୍କୁ ସାମିଲ କରାଯାଇଥିଲା । ୧୪ଟି ପ୍ରସଙ୍ଗ ଆଧାରରେ ଏହି ସର୍ବେକ୍ଷଣ ହୋଇଥିଲା ।
