ସୋମବାର ବ୍ରିଟିଶ୍ ପ୍ରଧାନମନ୍ତ୍ରୀ ବୋରିସ ଜନସନ ଏକ ବଡ଼ ଚେତାବନୀ ଦେଇଛନ୍ତି । ଶୀତଦିନେ ମହାମାରୀର ପ୍ରଥମ ତରଙ୍ଗ ତୁଳନାରେ ଶକ୍ତିଶାଳୀ ଦ୍ବିତୀୟ ତରଙ୍ଗ ଆସିପାରେ ଓ କରୋନାଜନିତ ମୃତ୍ୟୁ ଦ୍ବିଗୁଣିତ ହୋଇପାରେ ବୋଲି କହିଛନ୍ତି । ଏହାକୁ ଦୃଷ୍ଟିରେ ରଖି ବର୍ଧିତ କରୋନା ମାମଲାକୁ ରୋକିବା ପାଇଁ ସରକାର ୪ ସପ୍ତାହ ତାଲାବନ୍ଦ ଘୋଷଣା କରିଛନ୍ତି ଓ କଟକଣାକୁ ଆହୁରି କଡ଼ାକଡ଼ି କରିଛନ୍ତି ।
ହାଉସ ଅଫ୍ କମନ୍ସରେ ଦେଇଥିବା ଅଭିଭାଷଣରେ ଜନସନ କହିଛନ୍ତି ଯେ ସତର୍କତାର କୌଣସି ବିକଳ୍ପ ନାହିଁ। ଯୁକ୍ତରାଜ୍ୟରେ କରୋନା ଦ୍ୱାରା ମୃତ୍ୟୁ ସଂଖ୍ୟା ସମଗ୍ର ୟୁରୋପରେ ସର୍ବାଧିକ | ଗୋଟିଏ ଦିନରେ ଏବେ ୨୦ ହଜାରରୁ ଅଧିକ ନୂଆ ମାମଲା ଆସୁଛି | ବୈଜ୍ଞାନିକମାନେ ଚେତାବନୀ ଦେଇଛନ୍ତି ଯେ ଏହି ଶୀତରେ ମୃତ୍ୟୁ ସଂଖ୍ୟା୮୦୦୦୦ ଅତିକ୍ରମ କରିପାରେ ବୋଲି ଜନସନ କହିଛନ୍ତି । ସମ୍ପ୍ରତି ଇଂଲଣ୍ଡରେ ରୋଗୀଙ୍କ ସଂଖ୍ୟା ୧୦ ଲକ୍ଷରେ ପହଞ୍ଚିଛି । ରୁଷରେ ସଂକ୍ରମିତଙ୍କ ସଂଖ୍ୟା ୧୬.୫୫ ଲକ୍ଷ ଅତିକ୍ରମ କରିଛି । ରୁଷରେ ବର୍ତମାନ ସୁଦ୍ଧା ୨୮ ହଜାରରୁ ଅଧିକ ଲୋକ ମୃତ୍ୟୁବରଣ କରି ସାରିଛନ୍ତି ।
ଅନ୍ୟପକ୍ଷରେ ବିଶ୍ବ ସ୍ବାସ୍ଥ୍ୟ ସଙ୍ଗଠନର ମୁଖ୍ୟ ଟେଡ଼୍ରୋସ ଗାବ୍ରିଅସ ଜଣେ ସଂକ୍ରମିତଙ୍କ ସଂସ୍ପର୍ଶରେ ଆସିବା ପରେ ନିଜକୁ ସଙ୍ଗରୋଧରେ ରଖିଛନ୍ତି । ସେ କହିଛନ୍ତି ଯେ ମୋର କୌଣସି କରୋନା ଲକ୍ଷଣ ନାହିଁ, ମାତ୍ର ସତର୍କତା ଦୃଷ୍ଟିରୁ ସେ ନିଜକୁ କ୍ବାରେଣ୍ଟାଇନ କରିଥିବା ସୂଚନା ଦେଇଛନ୍ତି ।
