ଭୁବନେଶ୍ବର: ବିଜୁ ପଟ୍ଟନାୟକ ବୈଷୟିକ ବିଶ୍ବବିଦ୍ୟାଳୟ (ବିପିୟୁଟି)ଦ୍ବାରା ପରିଚାଳିତ ବି.ଟେକ୍, ବି.ଫାର୍ମା, ବି.ଆର୍କ ଏବଂ ଏମ୍ସିଏ ୪ର୍ଥ ଏବଂ ୬ଷ୍ଠ ସେମିଷ୍ଟର ପରୀକ୍ଷା ଫଳ ପ୍ରକାଶ ପାଇଛି। କୋଭିଡ଼ ନିୟମାବଳୀ ପାଳନ କରି ବିପିୟୁଟି ବି.ଟେକ୍ର ୪ର୍ଥ ଓ ୬ଷ୍ଠ ସେମିଷ୍ଟର, ବି.ଫାର୍ମା, ବି.ଆର୍କ ଏବଂ ଏମ୍ସିଏର ୬ଷ୍ଠ ସେମିଷ୍ଟର ପରୀକ୍ଷା ଅନ୍ଲାଇନ୍ରେ କରିଛି। ଏ ସମସ୍ତ ପାଠ୍ୟକ୍ରମରେ ୯୫ ପ୍ରତିଶତ ଫଳ ହୋଇଥିବା ବିପିୟୁଟି ପକ୍ଷରୁ ସୂଚନା ଦିଆଯାଇଛି।
ବି.ଟେକ୍ ୪ର୍ଥ ସେମିଷ୍ଟରରେ ୨୧ ହଜାର ଏବଂ ୬ଷ୍ଠ ସେମିଷ୍ଟରେ ୨୩ ହଜାର ବିଦ୍ୟାର୍ଥୀ ପରୀକ୍ଷା ଦେଇଛନ୍ତି। ବି.ଫାର୍ମାରେ ୧୬ ଶହ, ବି.ଆର୍କରେ ୨୫୦ ଏବଂ ଏମ୍ସିଏରେ ୩୫ ଶହ ଛାତ୍ରଛାତ୍ରୀ ପରୀକ୍ଷା ଦେଇଛନ୍ତି। ଫଳ ପ୍ରକାଶ ପାଇବା ପରେ ବିପିୟୁଟି ଛାତ୍ରଛାତ୍ରୀଙ୍କ ପ୍ରୋଭିଜ୍ନାଲ ଏବଂ ଗ୍ରେଡ଼ ସିଟ୍ ପ୍ରମାଣପତ୍ରକୁ ଅନ୍ଲାଇନ୍ରେ ଅପ୍ଲୋଡ଼ କରିଛି। କରୋନା ଯୋଗୁଁ ଦେଶର ବୈଷୟିକ ବିଶ୍ବବିଦ୍ୟାଳୟ ଗୁଡିକ ସେମିଷ୍ଟର ପରୀକ୍ଷା ସାରି ପାରି ନଥିବାବେଳେ ବିପିୟୁଟି ଶୃଙ୍ଖଳିତ ଭାବେ ଅନ୍ଲାଇନ୍ରେ ପରୀକ୍ଷା କରି ଫଳ ପ୍ରକାଶ କରିବାରେ ସଫଳ ହୋଇଛି। ମେ ଏବଂ ଜୁନ୍ ମାସରେ ହେବାକୁ ଥିବା ସେମିଷ୍ଟର ପରୀକ୍ଷାରେ ବିଳମ୍ବ ହେବା ନେଇ ଛାତ୍ରଛାତ୍ରୀ ଏବଂ ଅଭିଭାବକ ଚିନ୍ତାରେ ଥିଲେ। ଏପରିକି ୬ ମାସ ସମୟ ଅପଚୟ ହେବ ବୋଲି ଛାତ୍ରଛାତ୍ର ଆଶଙ୍କା କରୁଥିଲେ। ହେଲେ ସରକାରଙ୍କ ଅନ୍ଲାଇନ୍ ପରୀକ୍ଷା ପଦକ୍ଷେପ ଯୋଗୁଁ ଛାତ୍ରଛାତ୍ରୀଙ୍କ ସମୟ ରକ୍ଷା ହୋଇ ପାରିଛି। ୨୦୨୦-୨୦୨୧ ଶିକ୍ଷା ବର୍ଷର ସେମିଷ୍ଟର ପରୀକ୍ଷା ଡିସେମ୍ବର ୧୫ରେ କରିବା ପାଇଁ ବିଶ୍ବବିଦ୍ୟାଳୟ ପକ୍ଷରୁ ଯୋଜନା ପ୍ରସ୍ତୁତ ଚାଲିଛି। ଏ ସଂକ୍ରାନ୍ତରେ ଏକାଡେମୀ ପରିଷଦ ବୈଠକ ଡକା ଯାଇଥିବା ବିପିୟୁଟିର ଜଣେ ଅଧିକାରୀ କହିଛନ୍ତି।
କୌଣସି କାରଣବଶତଃ ଅନ୍ଲାଇନ୍ରେ ପରୀକ୍ଷା ଦେଇ ନଥିବା ଛାତ୍ରଛାତ୍ରୀଙ୍କ ଅଫ୍ଲାଇନ୍ ପରୀକ୍ଷା କେବେ କରାଯିବ ତାକୁ ନେଇ ଛାତ୍ରଛାତ୍ରୀ ଏବଂ ଅଭିଭାବକ ଚିନ୍ତିତ ଅଛନ୍ତି। ପରିସ୍ଥିତି ସ୍ବାଭାବିକ ହେଲେ ଅଫ୍ଲାଇନ୍ରେ ପରୀକ୍ଷା କରାଯିବ ବୋଲି ସରକାର କହିଥିଲେ। ହେଲେ ପରିସ୍ଥିତି ସ୍ବାଭାବିକ ହେଉ ନ ଥିବାରୁ କେନ୍ଦ୍ର ଓ ରାଜ୍ୟ ସରକାର ନଭେମ୍ବର ୩୦ ପର୍ଯ୍ୟନ୍ତ ଶିକ୍ଷାନୁଷ୍ଠାନ ବନ୍ଦ ରହିବ ବୋଲି ଅନ୍ଲକ-୬ ନିୟମାବଳୀରେ କହିଛନ୍ତି। ଏପରିସ୍ଥଳେ ସରକାର କିଛି କଲେଜରେ କେନ୍ଦ୍ର କରି ଅଫ୍ଲାଇନ୍ ପରୀକ୍ଷା କରିବାକୁ ଛାତ୍ରଛାତ୍ରୀ ପକ୍ଷରୁ ଅନୁରୋଧ କରାଯାଇଛି।
Comments are closed.