ପୁଅର ତଣ୍ଟି ଚିପି ହତ୍ୟାପରେ ମା’ର ଆତ୍ମହତ୍ୟା

ନାଉଗାଁ : ଜଗତସିଂହପୁର ଜିଲ୍ଲା ନାଉଗାଁ ଥାନା ସଠଳପୁର ଗାଁରେ ଏକ ଲୋମଜର୍ଷଣକାରୀ ଆତ୍ମହତ୍ୟା ଘଟିଛି । ଏହି ଗାଁରେ ଜଣେ ମହିଳାଙ୍କ ସମେତ ତାଙ୍କର ୫ବର୍ଷର ଶିଶୁପୁତ୍ର ର ସନ୍ଦେହ ଜନକ ଭାବରେ ମୃତ୍ୟୁ ହୋଇଛି । ମୃତକ ଜଣକ ହେଲେ ଏହି ଗାଁର ମନୋଜ ରାଉତଙ୍କ ସ୍ତ୍ରୀ ନିଳିମା ଓରଫ ତନୁଜା ରାଉତ ଓ ତାଙ୍କର ୫ବର୍ଷର ଶିଶୁପୁତ୍ର ମୁନୁ ଓରଫ ବିକ୍ରମାଦିତ୍ୟ ରାଉତ । ଗତକାଲି ବିଳମ୍ୱିତ ରାତିରେ ଏହି ଘଟଣା ଘଟିଥିବା ବେଳେ ପରିବାର ଲୋକେ ଏ ବାବଦରେ କାହାରିକୁ ନଜଣାଇ ରାତି ମଧ୍ୟରେ ଶବ ଦୁଇଟି କୁ ଗାଁ ମଶାଣିରେ ଦାହ କରି ଦେଇଥିବା ଜଣା ଯାଇଛି । ମୃତ ମହିଳା ଜଣକ ପ୍ରଥମେ ପୁଅର ତଣ୍ଟି ଚିପି ହତ୍ୟା କରିବା ପରେ ନିଜେ ରଶି ଲଗାଇ ଆତ୍ମ ହତ୍ୟା କରିଥିବାର ଶାଶୁ ଘର ଲୋକେ କହୁଛନ୍ତି। ମୃତ୍ୟୁର ସଠିକ କାରଣ ବର୍ତ୍ତମାନ ପର୍ଯ୍ୟନ୍ତ ଜଣା ପଡ଼ିନାହିଁ । ବିଳମ୍ବିତ ରାତିରେ ଘର ଲୋକେ ଖୋଜାଖୋଜି କରିବା ପରେ ପୁଅର ଶବକୁ ଅଳକା ନଦୀ ପାଣି ଭିତରୁ ଉଦ୍ଧାର କରିଥିବା ବେଳେ ନିଳିମାଙ୍କ ଶବକୁ ନଦୀ କୂଳର ଏକ ଗଛ ମୂଳରୁ ବେକରେ ରଶି ଲାଗିଥିବା ଅବସ୍ଥାରେ ଉଦ୍ଧାର କରିଥିଲେ ।ଘଟଣା ସମ୍ପର୍କରେ ନାଉଗାଁ ପୋଲିସ ନିଜ ଆଡୁ ଖବର ପାଇ ଘଟଣା ସ୍ଥଳରେ ପହଞ୍ଚିବା ସହ ମୃତକଙ୍କ ସ୍ୱାମୀ ମନୋଜ ରାଉତ ଓ ଶଶୁର ଅଭିଳାଷ ରାଉତଙ୍କୁ ଅଟକ ରଖି ତଦନ୍ତ ଚଳାଇଛି ।