ଆସନ୍ତା ନଭେମ୍ବର ୩ତାରିଖ ଆମେରିକା ରାଷ୍ଟ୍ରପତି ନିର୍ବାଚନ ପାଇଁ ଦିନ ଧାର୍ଯ୍ୟ ହୋଇଛି। ଆମେରିକାରେ ନିର୍ବାଚନ ପ୍ରଚାର ସରଗରମ ହୋଇଥିବା ବେଳେ ମହାକାଶରେ ବି ଏହି ପ୍ରଭାବ ଦେଖାଯାଇଛି। ଏଥର ଆମେରିକା ନିର୍ବାଚନରେ ମହାକାଶରୁ ମତଦାନ ହେବ। ନାସାର ମହିଳା ମହାକାଶ ଯାତ୍ରୀ ୪୧ବର୍ଷୀୟ କ୍ୟାଥଲିନ୍ ରୁବିନ୍ସ ଆସନ୍ତା ଅକ୍ଟୋବରରେ ୬ମାସ ପାଇଁ ମହାକାଶ ଯାତ୍ରା କରିବେ। ସେଠାରେ ଅନ୍ତର୍ଜାତୀୟ ମହାକାଶ କେନ୍ଦ୍ରରେ ରୁବିନ୍ସ ଏବଂ ତାଙ୍କ ସାଥୀମାନେ ରହଣି କରିବେ। ତେଣୁ ନଭେମ୍ବର ନିର୍ବାଚନ ଲାଗି ମହାକାଶରୁ ମତଦାନ କରିବେ ସେ। ୨୦୧୬ ଜୁଲାଇ ୭ରେ ନାସାର ୬୦ତମ ମହିଳା ମହାକାଶଯାତ୍ରୀ ଭାବେ ସେ ମହାକାଶକୁ ଯାଇଥିଲେ ଏବଂ ୧୧୫ଦିନ ରହି ଫେରିଆସିଥିଲେ। ଏଥର ନିର୍ବାଚନ ସମୟକୁ ପୃଥିବୀରେ ରହୁନଥିଲେ ମଧ୍ୟ ଜଣେ ଦାୟିତ୍ୱବାନ୍ ନାଗରିକ ଭାବେ ସେ ମହାକାଶରୁ ପ୍ରାୟ ୩୨୨ କିଲୋମିଟର ଦୂରରୁ ମତଦାନ କରିବେ ବୋଲି କହିଛନ୍ତି। ଏପରି କରିବାରେ ରୁବିନ୍ସ ସମ୍ଭବତଃ ବିଶ୍ୱର ପ୍ରଥମ ମହିଳା ମହାକାଶଯାତ୍ରୀ ହେବେ। ସେ ମିଶନ୍ କଣ୍ଟ୍ରୋଲରଙ୍କୁ ଇଲେକ୍ଟ୍ରୋନିକ ଭୋଟ୍ ଦ୍ୱାରା ନିଜ ମତ ପଠାଇବେ ଯାହା ମିଶନ କଣ୍ଟ୍ରୋଲ ପୃଥିବୀର ନିର୍ବାଚନ କମିଟିକୁ ପଠାଇବେ। ନାସା ନିଜ ମହାକାଶଚାରୀମାନଙ୍କ ମତଦାନକୁ ବେଶ୍ ସୁରକ୍ଷିତ ରଖିଥାଏ। ଏମାନଙ୍କୁ ମହାକାଶରୁ ମତଦାନ ଲାଗି ସ୍ୱତନ୍ତ୍ର ଅନୁମତି ମିଳେ।
Comments are closed.