ନୂଆଦିଲ୍ଲୀ: ସଂସଦର ଆଗାମୀ ମୌସୁମୀ ଅଧିବେଶନରେ ସୂଚନା ଅଧିକାର ଆଇନ୍ରେ ସଂଶୋଧନ ଆଣିବା ପାଇଁ କେନ୍ଦ୍ର ସରକାର ଚିନ୍ତା କରୁଛନ୍ତି। ଏ ସମ୍ପର୍କିତ ଚିଠା ପ୍ରସ୍ତାବ ଚୂଡ଼ାନ୍ତ ହୋଇଥିବା ବେଳେ ପାରିତ ହେବା ପାଇଁ ଗୃହରେ ଉପସ୍ଥାପନ କରାଯିବ। ଆରଟିଆଇ ଅଧିକାରୀଙ୍କ ବେତନ ହାରରେ ସଂଶୋଧନ ଉଦ୍ଦେଶ୍ୟରେ ଆରଟିଆଇ ଆଇନ ୨୦୦୫ରେ ସଂଶୋଧନ ଅଣାଯିବ ବୋଲି କେନ୍ଦ୍ର ସରକାର ସ୍ପଷ୍ଟୀକରଣ ଦେଇଛନ୍ତି। କିନ୍ତୁ ସେହି ଆଳରେ ଆଇନକୁ ସରକାର ଦୁର୍ବଳ କରିପାରନ୍ତି ବୋଲି ବିରୋଧୀ ଓ ସୂଚନା ଅଧିକାର କର୍ମୀମାନେ ଆଶଙ୍କା କରୁଛନ୍ତି। ପ୍ରଚଳିତ ବ୍ୟବସ୍ଥା ଅନୁଯାୟୀ କେନ୍ଦ୍ରର ମୁଖ୍ୟ ସୂଚନା ଅଧିକାର ଆୟୁକ୍ତ ଓ କେନ୍ଦ୍ର ନିର୍ବାଚନ ଆୟୁକ୍ତଙ୍କ ଦରମା ସମାନ ହୋଇଥିବା ବେଳେ ରାଜ୍ୟ ମୁଖ୍ୟ ନିର୍ବାଚନ ଆୟୁକ୍ତଙ୍କ ସହିତ ରାଜ୍ୟ ମୁଖ୍ୟ ସୂଚନା ଆୟୁକ୍ତ ସମାନ ଦରମା ପାଉଛନ୍ତି। ଦରମାରେ ଥିବା ଏହି ସଂଗତି ଯୋଗୁଁ ସରକାରୀ କାର୍ଯ୍ୟକାରିତାରେ କେତେକ ଅସ୍ୱସ୍ଥିକର ପରିସ୍ଥିତି ସୃଷ୍ଟି ହେଉଥିବା ଅଭିଯୋଗ ଆସିବା ପରେ ସରକାର ଆଇନରେ ସଂଶୋଧନ ଆଣିବା ପାଇଁ ଚିନ୍ତା କରୁଛନ୍ତି।
