ନାଗପୁରର ମହଲ ନଗର ଅଞ୍ଚଳରେ ସ୍ଥାନୀୟ ଲୋକଙ୍କ ପାଖରେ ଶାରଦା ଚୌରଗଡ଼େ ଏକ ପରିଚିତ ନାମ। ବିଶେଷ କରି ବିଦ୍ୟାଳୟ ଓ ମହାବିଦ୍ୟାଳୟ ଯାଉଥିବା ଛାତ୍ରଛାତ୍ରୀଙ୍କ ପାଖରେ ସେ ଜଣାଶୁଣା ନାମ। କାରଣ ଗତ କିଛି ବର୍ଷ ହେଲା, ସେ ମାତ୍ର ୧୦ଟଙ୍କାରେ ଦୋସା ଓ ଇଡଲି ବିକ୍ରି କରିଆସୁଛନ୍ତି। ଗରିବ, ଅସହାୟ ଲୋକ ମଧ୍ୟ ତାଙ୍କର ନିୟମିତ ଗ୍ରାହକ। ଶାରଦା କହିଛନ୍ତି, ଖୁବ୍ କମ୍ ବୟସରେ ତାଙ୍କ ବିବାହ ହୋଇଥିଲା। ଶାଶୂଘର ଲୋକ ବିବାହ ଦିନରୁ ତାଙ୍କ ଉପରେ ଅତ୍ୟାଚାର କରୁଥିଲେ। ତାଙ୍କ ସମୟରେ ଏଭଳି ଘଟଣାକୁ ସମସ୍ତେ ସାଧାରଣ କଥା ବୋଲି କହୁଥିଲେ। ପିଲାଙ୍କ ଜନ୍ମ ପରେ ମଧ୍ୟ ତାଙ୍କ ପ୍ରତି ପରିବାର ସଦସ୍ୟଙ୍କ ମନୋଭାବ ପରିବର୍ତ୍ତନ ହୋଇନଥିଲା। ଆର୍ଥିକ ଅସୁବିଧା ଦିନକୁଦିନ ବଢ଼ିବା ପରେ ଶେଷେର ସେ ଘର ପାଖରେ ଏକ ଷ୍ଟଲ୍ କରି ଦୋସା ଓ ଇଡଲି ତିଆରି କରି ବିକିଲେ। ଏତେ କମ୍ ଦରରେ ପେଟପୂରା ଖାଦ୍ୟ ଗ୍ରାହକଙ୍କୁ ମିଳୁଥିବାରୁ ଦିନକୁଦିନ ଗ୍ରାହକଙ୍କ ସଂଖ୍ୟା ବଢ଼ିଲା। ଶାରଦାଙ୍କର ଲାଭ ସେଭଳି ହେଉନଥିଲା କିନ୍ତୁ ଗ୍ରାହକଙ୍କ ଆତ୍ମସନ୍ତୋଷ ହିଁ ତାଙ୍କ ପାଉଣା ଥିବାର ସେ କହିଛନ୍ତି। ୧୦ ଟଙ୍କାରେ ୪ଟି ଇଡଲି, ସମ୍ବର, ଚଟଣି ମିଳୁଥିବାବେଳେ ୧୦ ଟଙ୍କାରେ ସେ ୪ଟି ଛୋଟ ଦୋସା ମଧ୍ୟ ପରଷିଥାନ୍ତି। ଦୋସା ଦୋକାନ ପାଇଁ ତାଙ୍କ ଲୋକପ୍ରିୟତା ଦିନକୁଦିନ ବଢ଼ିଚାଲିବାରୁ ଆଜି ସେ ସ୍ଥାନୀୟ ଅଞ୍ଚଳରେ ‘ଦୋସା ଆଣ୍ଟି’ ନାମରେ ପରିଚିତ। ଶାରଦାଙ୍କ ମତରେ ପରିଶ୍ରମ କଲେ ପ୍ରତ୍ୟେକ କାମରେ ସଫଳତା ମିଳେ। କାମ ଛୋଟ କିମ୍ବା ବଡ଼, ଏ ଲକ୍ଷ୍ୟ ନ ରଖି ବରଂ କାମକୁ ଭଲଭାବେ କରିବା ନିମନ୍ତେ ଆଗ୍ରହ ରଖିବା ଦରକାର। n
Popular Categories
Previous article
Next article