କଲମପୁର: କରୋନା ବଳୟରେ ଏବେ କଳାହାଣ୍ଡି। ରିତିମତ ବୃଦ୍ଧି ପାଉଛି କରୋନା ଆକ୍ରାନ୍ତଙ୍କ ସଂଖ୍ୟା। ସମଗ୍ର ୧୩ ଗୋଟି ବ୍ଲକକୁ ପ୍ରସାର ହେଇ ସାରିଛି କରୋନା ଭୂତାଣୁ। ଲୋକଙ୍କ ମଧ୍ୟରେ କରୋନା ଭୂତାଣୁ ସଂକ୍ରମଣ ନେଇ ଆଶଙ୍କା ଥିଲେ ମଧ୍ୟ କିଛି ବ୍ୟକ୍ତି ବିଶେଷ ବେଖାତିର କରୁଥିବାରୁ ସଂକ୍ରମଣ ବୃଦ୍ଧି ପାଉଛି। ବୁଧବାର ଚିହ୍ନଟ ହେଇଥିବା ଆକ୍ରାନ୍ତଙ୍କ ମଧ୍ୟରୁ କଲମପୁର ବ୍ଲକ ଅଂଚଳରେ କାର୍ଯ୍ୟରତ ଦୁଇ ଜଣ ମହିଳା କର୍ମଚାରୀ କରୋନା ଭୁତାଣୁରେ ସଂକ୍ରମିତ ହେଇଥିବା ସୁଚନା ମିଳିଛି। ଏହି ଦୁଇ ଜଣ ମହିଳା କର୍ମଚାରୀଙ୍କ ମଧ୍ୟରୁ ଜଣେ କରୋନା ଯୋଦ୍ଧା ଭାବେ କାର୍ଯ୍ୟରତ ସ୍ୱାସ୍ଥ୍ୟ କର୍ମୀ। ଦୁଇଜଣ କର୍ମଚାରୀଙ୍କ ମଧ୍ୟରୁ ଜଣକ ଧର୍ମଗଡରୁ ଯାତାୟତ କରି କାର୍ଯ୍ୟ ସମ୍ପାଦିତ କରୁଥିବା ବେଳେ ଅନ୍ୟ ଜଣକ ଭବାନିପାଟଣାରୁ ଯାତାୟତ କରି କାର୍ଯ୍ୟ ସମ୍ପାଦିତ କରୁଥିଲେ। ଗତ କିଛି ଦିନ ମଧ୍ୟରେ କାର୍ଯ୍ୟାଳୟକୁ ଆସିଥିଲେ ମଧ୍ୟ ଅନ୍ୟ କୌଣସି ସହକର୍ମୀଙ୍କ ସଂସ୍ପର୍ଶରେ ଆସିନଥିଲେ। ଭବାନିପାଟଣାରୁ ଆସିଥିବା କର୍ମଚାରୀ ଜଣକ ନିକଟରେ କୌଣସି ଏକ ସଂପର୍କୀୟଙ୍କ ଦଶାହ କାର୍ଯ୍ୟରେ ଯୋଗ ଦେଇଥିବା ସୂଚନା ମିଳିଛି। ଏହି କାର୍ଯ୍ୟରୁ ସେ ସଂକ୍ରମିତ ହେଇଥିବା ଆଶଙ୍କା କରାଯାଉଛି। ସେହିଭଳି ଧର୍ମଗଡରୁ ଯାତାୟତ କରୁଥିବା କର୍ମଚାରୀ ଜଣକ ମଧ୍ୟ ସେହି ଅଂଚଳରୁ ସଂକ୍ରମିତ ହେଇଥିବା ସୁଚନା ମିଳିଛି। ଉଭୟ ଆକ୍ରାନ୍ତ ଚିହ୍ନଟ ହେବା ପରେ କଲମପୁର ଅଗ୍ନିଶମ ବିଭାଗ ତରଫରୁ ମହିଳା କର୍ମଚାରୀ ମାନେ ନିୟୋଜିତ ଥିବା କାର୍ଯ୍ୟାଳୟକୁ ବିଶୋଧିତ କରାଯାଇଛି। ଅନ୍ୟପଟେ ଉଭୟ ଆକ୍ରାନ୍ତ ନିଜ ନିଜ ଘରେ ସଙ୍ଗରୋଧ ଭାବେ ରହି ଚିକିତ୍ସିତ ହେବେ।
Comments are closed.