ଅନ୍ ଲାଇନ ଗେମରେ ୧୧୦୦ କୋଟି ଟଙ୍କା ଠକେଇ; ଚୀନ ନାଗରିକ ସମେତ ୪ ଗିରଫ
![](https://samajalive.in/wp-content/uploads/2020/08/download-20-700x430.jpg)
ହାଇଦ୍ରାବାଦ: ହାଇଦ୍ରାବାଦ ପୁଲିସ ଚୀନରୁ ନିୟନ୍ତ୍ରିତ ହେଉଥବା ଏକ ବଡ଼ ଠକେଇର ରହସ୍ୟ ଉନ୍ମୋଚନ କରିଛନ୍ତି । ସୂଚନା ଅନୁସାରେ ଜଣେ ଚୀନା ନାଗରିକଙ୍କ ଇଙ୍ଗିତରେ କୋଟି କୋଟି ଟଙ୍କା କାରବାର ହେଉଥିଲା । ଅନଲାଇନ୍ ଗେମ୍ ୱେବସାଇଟ୍ ଜରିଆରେ ଭାରତୀୟ ଲୋକଙ୍କୁ ଲୁଟ୍ କରାଯାଉଥିଲା । ଏହି ଚୀନ ନାଗରିକଙ୍କୁ ହାଇଦ୍ରାବାଦ ପୁଲିସ ଗିରଫ କରିଛି । ଏହି ଚୀନ ନାଗରିକଙ୍କୁ ପୁଲିସ ଠକେଇ ଓ ବିଶ୍ଵାସଘାତକତାର ମାଷ୍ଟରମାଇଣ୍ଡ ବୋଲି ଅଭିହିତ କରିଛି । ସମ୍ପୃକ୍ତ ଚୀନ ବ୍ୟକ୍ତିର ୩ ଭାରତୀୟ ସାଥୀ ମଧ୍ୟ ଗିରଫ ହୋଇଛନ୍ତି ।
ହାଇଦ୍ରାବାଦ ପୁଲିସ କମିଶନ ଅଞ୍ଜନୀ କୁମାର କହିଛନ୍ତି ଯେ ଏହି ସବୁ ଗେମ୍ ୱେବସାଇଟ୍ ଚୀନ ପ୍ରସ୍ତୁତ ଓ ଏହା ସେଇଠାରୁ ନିୟନ୍ତ୍ରିତ ହୋଇ ଆସୁଛି । ଏହାର ଡ଼ାଟା ପରିଚାଳନା କ୍ଲାଉଡ଼ ଆଧାରିତ ଓ ଚୀନରୁ ଏହା କାର୍ଯ୍ୟ କରୁଛି । କିଛିଦିନ ତଳେ ହାଇଦ୍ରାବାଦ ପୁଲିସ ନିକଟରେ କିଛି ଲୋକ ଅଭିଯୋଗ କରିଥିଲେ । ଏକ ଅନଲାଇନ୍ ଗେମ୍ ୱେବସାଇଟ୍ ଦ୍ବାରା ସେମାନଙ୍କୁ ଠକି ନିଆଯାଇଥିବା ଅଭିଯୋଗ ହୋଇଥିଲା । ଏହାପରେ ଆଉ ଦୁଇଜଣ ନିର୍ଦିଷ୍ଟ ଭାବରେ ଏହି ଅନଲାଇନ୍ ଗେମ୍ ସମ୍ପର୍କରେ ପୁଲିସ ନିକଟରେ ଲିଖିତ ଅଭିଯୋଗ କରିଥିଲେ ।
ସେମାନେ ଏହି ଗେମରେ ଟଙ୍କା ଲଗାଇଥିଲେ ଓ ସେମାନଙ୍କ ମଧ୍ୟରୁ ଜଣକଠାରୁ ୯୭ ହଜାର ଓ ଅନ୍ୟ ଜଣଙ୍କ ଠାରୁ ୧.୬୪ ଲକ୍ଷ ଟଙ୍କା ଠକି ନିଆଯାଇଥିଲା । ଏହି ଦୁଇ ଅଭିଯୋଗ ଆଧାରରେ ହାଇଦ୍ରାବାଦ ପୁଲିସ ସାଇବର କ୍ରାଇମ ସେଲ୍ ଯାଞ୍ଚ ଆରମ୍ଭ କରିଥିଳା । ଏତିକିବେଳେ ଏହି ଅନଲାଇନ୍ ଗେମ୍ ଟେଲିଗ୍ରାମ୍ ଗ୍ରୁପ୍ ଜରିଆରେ କରାଯାଉଥିବା ଜଣା ପଡ଼ିଥିଲା । ଏହି ଗ୍ରୁପରେ କେବଳ ସୁପାରିସ ଆଧାରରେ ପ୍ରବେଶ କରିବାକୁ ସୁଯୋଗ ମିଳିଥାଏ । ଏହା ସହ ଗ୍ରୁପରେ ଅଧିକରୁ ଅଧିକ ଲୋକଙ୍କୁ ଯୋଡ଼ିବା ପାଇଁ କମିଶନ ମଧ୍ୟ ଦିଆଯାଇଥାଏ । ଆଉ କେବଳ ଟେଲିଗ୍ରାମ ଗ୍ରୁପରେ ଏହା କରାଯାଇଥାଏ ।
ଟେଲିଗ୍ରାମରେ ସୃଷ୍ଟି ହୋଇଥିବା ଗ୍ରୁପ୍ର ଆଡ଼ମିନ୍ ୱେସାଇଟ ଓ ଅନଲାଇନ ଗେମ୍ ଗୁଡ଼ିକ ସମ୍ପର୍କରେ ସୂଚନା ଦେଇଥାଏ, ଯେଉଁଥିରେ ଟଙ୍କା ଲଗାଯାଇଥାଏ । ଏହି ୱେବସାଇଟ ପ୍ରତିଦିନ ବଦଳୁଥାଏ । ଯାହା ଫଳରେ ଏହାକୁ ଧରିବା ସମ୍ଭାବନା ନ ଥାଏ । ଏହାପରେ ଏକ ରଙ୍ଗ ଜରିଆରେ ଟଙ୍କା ଲଗାଇବା ସଂକ୍ରାନ୍ତ ଖେଳ ଖେଳାଯାଇଥାଏ । ଏଥିରେ ଖେଳାଳି ରଙ୍ଗର ଭବିଷ୍ୟବାଣୀ କରିଥାଏ । ଖେଳାଳି ଯେଉଁ ରଙ୍ଗ ଭବିଷ୍ୟବାଣୀ କରିଥାଏ ତାହା ଦିଶିଲେ ବିଜେତା ଘୋଷଣା କରାଯାଏ ଏବଂ ଯଦି ସେହି ରଙ୍ଗ ପରିବର୍ତ୍ତେ ଅନ୍ୟ ରଙ୍ଗ ଆସିଲା ତେବେ ଖେଳାଳି ହାରିଥାଏ ଓ ଲଗାଇଥିବା ଟଙ୍କା କମ୍ପାନୀ ନେଇଯାଇଥାଏ । ହାଇଦ୍ରାବାଦ ପୁଲିସ କମିଶନରଙ୍କ ସୂଚନା ଅନୁସାରେ ଯାଞ୍ଚ ବେଳେ କେବଳ ଚଳିତ ବର୍ଷ ୧୧ଶହ କୋଟି ଟଙ୍କାର ନେଣଦେଣ ହୋଇଥିବା ସୂଚନା ମିଳିଛି । ଏ ସମ୍ପର୍କରେ ଅଧିକ ଅନୁସନ୍ଧାନ ଜାରି ରହିଛି ।
Comments are closed.