କରୋନା ପାଇଁ ମାଉଥ୍ ସ୍ପ୍ରେ ; ମାତ୍ର ୨୦ ମିନିଟରେ ଦୂର ହେବ କରୋନା ଭୂତାଣୁ – କମ୍ପାନୀର ଦାବି

ନୂଆଦିଲ୍ଳୀ : କରୋନା ଭୂତାଣୁ ସଂକ୍ରମଣ ସମଗ୍ର ବିଶ୍ୱ ପାଇଁ ମହାମାରୀ ରୂପ ଧାରଣ କରିଛି। ଦିନକୁ ଦିନ ସଂକ୍ରମିତ ଏବଂ ମୃତକଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ଏହାକୁ ରୋକିବା ପାଇଁ ଭାରତ ସମେତ ବିଶ୍ବର ଅନେକ ଦେଶରେ ୧୨୦ରୁ ଅଧିକ ପ୍ରକାରର ଭ୍ୟାକ୍ସିନ ବା ଟିକା ଉପରେ ଗବେଷଣା ଜାରି ରହିଛି। ସେଥିମଧ୍ୟରୁ ୨୧ରୁ ଅଧିକ ଟିକା କ୍ଲିନିକାଲ ପରୀକ୍ଷଣ ପର୍ଯ୍ୟାୟରେ ରହିଛି। ଏହା ବ୍ୟତୀତ କରୋନା ଭୂତାଣୁ ଚିକିତ୍ସା ପାଇଁ ଔଷଧ ଉପରେ ମଧ୍ୟ ଗବେଷଣା କରାଯାଉଛି। ବର୍ତ୍ତମାନ କରୋନା ଭୂତାଣୁରୁ ରକ୍ଷା ପାଇବା ପାଇଁ ସ୍ୱିଡେନର ଏକ କମ୍ପାନୀ ମାଉଥ୍ ସ୍ପ୍ରେ ପ୍ରସ୍ତୁତ କରିଛି। ଯାହା କିଛି ମିନିଟ୍ ମଧ୍ୟରେ କରୋନା ଭୂତାଣୁ ଦୂର କରି ପାରିବ ବୋଲି କମ୍ପାନୀ ପକ୍ଷରୁ ଦାବି କରାଯାଉଛି।

ଇଂରାଜୀ ୱେବସାଇଟ୍ ସିଏନବିସି (CNBC)ର ଏକ ଖବର ଅନୁଯାୟୀ ସ୍ୱିଡେନ ଲାଇଫ୍ ସାଇନ୍ସ କମ୍ପାନୀ ଏନଜାଇମାଟିକା (Swedish life science company Enzymatica) କରୋନା ଭୂତାଣୁ ନଷ୍ଟ ପାଇଁ ମାଉଥ୍ ସ୍ପ୍ରେ ପ୍ରସ୍ତୁତ କରିଛି। କମ୍ପାନୀ ପକ୍ଷରୁ ଗବେଷଣା କରାଯାଇ ଜୁଲାଇ ୨୦ରେ ଏନେଇ ରିପୋର୍ଟ ପ୍ରକାଶ ପାଇଛି। କମ୍ପାନୀ ଦାବି କରିଛି ଯେ, ଏହି ସ୍ପ୍ରେ ୨୦ ମିନିଟ୍ ମଧ୍ୟରେ ୯୮.୩% କରୋନା ଭୂତାଣୁକୁ ନଷ୍ଟ କରିବ। ଏହି ସ୍ପ୍ରେ ଥଣ୍ଡା, କାଶ ଏବଂ ଜ୍ୱରକୁ ମଧ୍ୟ ଭଲ କରିବ ବୋଲି ରିପୋର୍ଟରେ ପ୍ରକାଶ ପାଇଛି।

କମ୍ପାନୀ ପକ୍ଷରୁ ଏହି ସ୍ପ୍ରେକୁ କୋଲ୍ଡଜାଇମ୍ ନାମରେ ନାମିତ କରାଯାଇଛି। ଆନ୍ତର୍ଜାତୀୟ ପରୀକ୍ଷଣ ପ୍ରଣାଳୀରେ ଆମେରିକାର ମାଇକ୍ରୋବକ୍ସ ଲାବୋରେଟୋରୀରେ ଏହି ସ୍ପ୍ରେ ଉପରେ ଅଧିକ ଅନୁସନ୍ଧାନ ଜାରି ରହିଛି।