ରାସ୍ତାରେ ଆଣ୍ଠୁଏ କାଦୁଅ, ଆସିପାରିଲାନି ଆମ୍ବୁଲାନ୍ସ : ଖଟିଆରେ ୩କିମି ବୁହାହେଲେ ପକ୍ଷାଘାତ ରୋଗୀ

ଚାନ୍ଦବାଲି : ରାସ୍ତା ଅବସ୍ଥା ଏପରି ବିପର୍ଯ୍ୟସ୍ତ ହୋଇଛି ଯେ ରୋଗୀଙ୍କୁ ଡାକ୍ତରଖାନା ନେବାକୁ ଗଁା ଭିତରକୁ ଆମ୍ବୁଲାନ୍ସ ଆସିପାରିଲାନି। ଫଳରେ ଗୁରୁତର ପକ୍ଷାଘାତ ରୋଗୀଙ୍କୁ ଖଟିିଆରେ ୩କିମି ବୋହିବାକୁ ପଡ଼ିଲା। ଗଁା ଭିତରକୁ ଆମ୍ବୁଲାନ୍ସ ଆସିପାରୁ ନଥିବାରୁ ବର୍ଷାଋତୁ ୪ ମାସ ଯାଏ ରୋଗୀଙ୍କ ପାଇଁ ଏକମାତ୍ର ବିକଳ୍ପ ପାଲଟିଛି ଖଟିଆ। ଏମିତି ଏକ ଅପହଞ୍ଚ ଗାଁ ଚାନ୍ଦବାଲି ବ୍ଲକ ଅନ୍ତର୍ଗତ ନଳଗୋହିରା ପଞ୍ଚାୟତର ନୂଆଗାଁ। ଗାଁ ମଧ୍ୟକୁ ନିତିଦିନିଆ ଭଲ ରାସ୍ତାଟିଏ ନାହିଁ। ଏବେ ବର୍ଷା ହେବା ପରେ ରାସ୍ତାରେ ଆଣ୍ଠୁଏ ଉଚ୍ଚର କାଦୁଅ ହୋଇଛି। ପ୍ରତିଦିନ ଗ୍ରାମବାସୀ ଏହି କାଦୁଅ ରାସ୍ତାରେ ଯାତାୟାତ କରୁଛନ୍ତି। ଘଟଣା ଅନୁଯାୟୀ; ଗୁରୁବାର ବିଳମ୍ବିତ ରାତ୍ରିରେ ନୂଆଗଁାରେ ନବଘନ ରାଉତଙ୍କ ସ୍ତ୍ରୀ ଶାନ୍ତିଲତା ରାଉତଙ୍କୁ ପକ୍ଷାଘାତ ହୋଇଥିଲା। ତେବେ ଡାକ୍ତରଖାନା ନେବା ପାଇଁ ଗଁା ରାସ୍ତାରେ ଆମ୍ବୁଲାନ୍ସ ଆସିବା ସମ୍ଭବପର ନଥିଲା। ତେଣୁ ପରିବାର ଲୋକ ଶାନ୍ତିଲତାଙ୍କୁ ଖଟିଆରେ ୩ କିମି କାଦୁଅ ରାସ୍ତା ଦେଇ ମୁଖ୍ୟ ରାସ୍ତାକୁ ଆଣି ଏକ ଘରୋଇ ଗାଡ଼ିରେ ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ରୋଗୀ ଭର୍ତ୍ତି କରିଛନ୍ତି। ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଏଥିପ୍ରତି ପ୍ରାଶାସନିକ ଅଧିକାରୀ ଦୃଷ୍ଟି ଦେଇ ଯଥାଶୀଘ୍ର ରାସ୍ତା ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।