ସିନ୍ଧେକେଲା/ବଙ୍ଗୋମୁଣ୍ଡା : ବଲାଙ୍ଗିର ଜିଲା ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ସିନ୍ଧେକେଲା କ୍ୱେରାଣ୍ଟାଇନ ସେଣ୍ଟରରୁ ପୁଣି ଆଉ ଦୁଇ ଜଣ କରୋନା ରୋଗୀ ଚିହ୍ନଟ ହେବାରୁ ଅଞ୍ଚଲରେ ଭୟର ବାତାବରଣ ସୃଷ୍ଟି ହୋଇଛି । ପ୍ରଥମ ପର୍ଯ୍ୟାୟରେ ୮ ଜଣଙ୍କ ସ୍ୱାବ ନମୂନା ପଠାଯାଇଥିଲା। ସେମଧ୍ୟରୁ ଗତ ୨୩ରେ ୩ ଜଣଙ୍କ ରିପୋର୍ଟ ଆସିଥିଲା। ସେମାନଙ୍କ ମଧ୍ୟରୁ ଜଣଙ୍କ ରିପୋର୍ଟ ପଜିଟିଭ୍ ଆସିଥିବା ବେଳେ ୨ଜଣଙ୍କ ନେଗେଟିଭ ଆସିଥିଲା। ବାକି ୫ ଜଣଙ୍କ ରିପୋର୍ଟ ଆଜି ଆସିଥିବା ବେଳେ ପୁଣି ୨ଜଣ ସେଭିତରୁ ଚିହ୍ନଟ ହୋଇଛନ୍ତି । ସେମାନଙ୍କୁ ଆଜି ତୁରନ୍ତ ଏମ୍ବୁଲେନ୍ସ ଯୋଗେ ଜିଲା ସ୍ୱାସ୍ଥ୍ୟ ବିଭାଗ ପକ୍ଷରୁ ବଲାଙ୍ଗିର ନିଆଯାଇ ସେଠାରୁ ଭୂବନେଶ୍ୱର ପଠାଯାଇଛି । ଦ୍ୱିତୀୟ ପର୍ଯ୍ୟାୟରେ ଗତକାଲି ଆଉ ୨୪ ଜଣଙ୍କ ସ୍ୱାବ ନମୂନା ପରୀକ୍ଷା ପାଇଁ ନିଆଯାଇଛି ତାହା ଏପର୍ଯ୍ୟନ୍ତ ରିପୋର୍ଟ ହସ୍ତଗତ ହୋଇନାହିଁ। ଆଜି ଚିହ୍ନଟ ହୋଇଥିବା ଦୁଇ ଜଣଙ୍କ ମଧ୍ୟରେ ଜଣେ ସିନ୍ଧେକେଲା ଓ ଅନ୍ୟ ଜଣେ ଭତାସର ଗ୍ରାମର ବୋଲି ଜଣାପଡିଛି।
ସେହିଭଳି ବଙ୍ଗୋମୁଣ୍ଡା ବ୍ଲକର ବିରିପାଲି ପଞ୍ଚାୟତରେ ମଧ୍ୟ ଜଣେ କରୋନା ରୋଗୀ ଚିହ୍ନଟ ହୋଇଥିବା ଖବର ମିଳିଛି। ଏହା ସହ ପୁରା ବ୍ଲକରେ କରୋନା ଚିହ୍ନଟ ସଂଖ୍ୟା ମୋଟ ୪ ରେ ପହଞ୍ଚିଛି। ବିରିପାଲି ପଞ୍ଚାୟତରେ କରୋନା ରୋଗୀ ଚିହ୍ନଟ ହେବା ପରେ ସରପଞ୍ଚ ମୋହନା ଜାଳ ୨୬ ତାରିଖ ସକାଳ ୭ଟା ରୁ ୨୮ ତାରିଖ ସନ୍ଧ୍ୟା ୭ଟା ପର୍ଯ୍ୟନ୍ତ ୩ ଦିନ ପାଇଁ ସଂପୂର୍ଣ୍ଣ ପଞ୍ଚାୟତକୁ ୧୪୪ ଧାରା ସହ ଜନତା ଘୋଷଣା କରିଛନ୍ତି। ଯାହା ଫଳରେ ସମସ୍ତ ଦୋକାନ ବଜାର ସହ ଦୁଇ ଓ ଚାରି ଚକିଆ ଯାନବାହାନ ଚଳାଚଳ ବନ୍ଦ ରହିବ।
