ଭୁବନେଶ୍ଵର : ଆସନ୍ତାକାଲି ଠାରୁ ରାଜ୍ୟରେ ମଦ ହୋମ୍ ଡେଲିଭରି ହେବ । ମଦ ଦୋକାନ ଖୋଲାହେଲେ ଗ୍ରାହକ ସାମଜିକ ଦୂରତ୍ଵ ମାନୁ ନଥିବା କାରଣରୁ ରାଜ୍ୟ ସରକାର ଦୋକାନ ନଖୋଲି ଅନଲାଇନ ଅର୍ଡର ପରେ ଘରେ ହୋମ୍ ଡେଲିଭରୀ କରାଇବା ପାଇଁ ନିଷ୍ପତ୍ତି ନେଇଛନ୍ତି । କିନ୍ତୁ କଣ୍ଟେନମେଣ୍ଟ ଜୋନରେ ଏହି ନିୟମ ଲାଗୁ ହେବ ନାହିଁ ବୋଲି ରାଜ୍ୟ ସରକାର ନିଷ୍ପତ୍ତି ନେଇଛନ୍ତି । ରାଜ୍ୟ ସରକାର ଓଡ଼ିଶା ଅବକାରୀ ନିୟମ-୨୦୧୭ର ସଂଶୋଧନ କରିବା ସହ ମଦ ଉପରେ ସ୍ପେଶାଲ କୋଭିଡ ଫି ଲଗାଇଛନ୍ତି । ବିଦେଶୀ ମଦ, ବିୟର ଉପରେ ସ୍ପେଶାଲ କୋଭିଡ୍ ଫି ଅର୍ଥାତ ଏମଆରପି ଉପରେ ୫୦ ପ୍ରତିଶତ ଅଧିକ ଫି ଦେବାକୁ ପଡିବ ବୋଲି ସୂଚନା ମିଳିଛି ।
ରାଜ୍ୟରେ ଖାଦ୍ୟ ହୋମ୍ ଡେଲିଭରି କରୁଥିବା ସଂସ୍ଥା କିମ୍ବା ନିଜେ ମଦଦୋକାନୀ ପିଲା ରଖି ମଦର ହୋମ୍ ଡେଲିଭରି କରିପାରିବେ । ସର୍ବନିମ୍ନ ୫୦୦ ଟଙ୍କାର ମଦ କିଣିଲେ ଏଥିପାଇଁ ୫୦ ଟଙ୍କାର ସର୍ଭିସ୍ ଚାର୍ଜ ବା ଡେଲିଭରି ଚାର୍ଜ ଦେବାକୁ ପଡ଼ିପାରେ। ଏହା ସହିତ ଏମଆରପି ଉପରେ ୫୦ ପ୍ରତିଶତ ଅଧିକ ଫି ଦେବାକୁ ପଡିବ। ଜଣେ ଗ୍ରାହକ ସର୍ବାଧିକ ୫ ଲିଟର ବିୟର ଓ ସର୍ବାଧିକ ଅଢ଼େଇ ଲିଟର ମଦ ପାଇଁ ଅର୍ଡର ଦେଇପାରିବେ ବୋଲି ପ୍ରସ୍ତାବ ରହିଛି। ମଦ ବିକ୍ରିରେ ମିଳିବାକୁ ଥିବା ରାଜସ୍ୱ କରୋନା ମୁକାବିଲା କ୍ଷେତ୍ରରେ ଖର୍ଚ୍ଚ କରାଯିବ ବୋଲି ରାଜ୍ୟ ସରକାରଙ୍କ ପକ୍ଷରୁ ସୂଚନା ମିଳିଛି ।
