ଭୁବନେଶ୍ବର (ବ୍ୟୁରୋ): ରାଜ୍ୟରେ ଚିହ୍ନଟ ହୋଇଥିବା ୪୪ ତମ ‘କରୋନା’ ଆକ୍ରାନ୍ତ ପଶ୍ଚିମବଙ୍ଗରୁ ଓଡ଼ିଶା ଆସିଥିଲେ । ସେ ମେଦିନପୁର ଅଞ୍ଚଳରୁ ଏକ ଆମ୍ବୁଲାନ୍ସରେ ଭୁବନେଶ୍ବରସ୍ଥିତ ଆପୋଲୋ ହସ୍ପିଟାଲକୁ ଆସିଥିଲେ । ୭ ତାରିଖରେ ସେ ମେଦିନପୁରରୁ ବାହାରିଥିଲେ। ବାଟରେ ଆସିବାବେଳେ ବାଲେଶ୍ବର ନିକଟରେ ଏକ ଦୋକାନରେ ଚା ପିଇଥିଲେ ଓ ୮ ତାରିଖରେ ଭୁବନେଶ୍ବରସ୍ଥିତ ଆପୋଲୋ ହସ୍ପିଟାଲରେ ଭର୍ତି ହୋଇଥିଲେ । ୯ ତାରିଖରେ ତାଙ୍କୁ କିମ୍ସ କୋବିଦ-୧୯ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ରାଜ୍ୟ ସୂଚନା ଓ ଲୋକସମ୍ପର୍କ ବିଭାଗ ଏ ସମ୍ପର୍କରେ ସୂଚନା ଦେଇଛି ।
ଗୁରୁବାର ଓଡ଼ିଶାରେ ଦୁଇଜଣ କରୋନା ସଂକ୍ରମିତ ହୋଇଥିବା ସରକାରଙ୍କ ପକ୍ଷରୁ ସୂଚନା ଦିଆଯାଇଥିଲା । ମେଦିନପୁରରୁ ଆସିଥିବା ଏହି ବୃଦ୍ଧଙ୍କ ବ୍ୟତୀତ ଢ଼େଙ୍କାନାଳ ଜିଲାରେ ଜଣେ ମହିଳା ଚିହ୍ନଟ ହୋଇଥିଲେ । ସୂଚନା ଅନୁସାରେ ସମ୍ପୃକ୍ତ ମହିଳା ରାଜ୍ୟ ବାହାରକୁ ଯାଇ ନାହାନ୍ତି । ଜଣେ ନିଜାମୁଦ୍ଦିନ ଫେରନ୍ତା ଧର୍ମ ପ୍ରଚାରକଙ୍କ ସଂସ୍ପର୍ଶରେ ଆସିଥିବାରୁ ତାଙ୍କୁ ସଙ୍ଗରୋଧ କରାଯାଇଥିଲା ଏବଂ ତାଙ୍କ ନମୁନା ପରୀକ୍ଷା ପାଇଁ ପଠାଯାଇଥିଲା । ଏହି ନମୁନା ପଜିଟିଭ୍ ଆସିଛି । ସମ୍ପୃକ୍ତ ମହିଳାଙ୍କୁ କଟକର ଅଶ୍ବିନୀ ହସ୍ପିଟାଲକୁ ପଠାଯାଇଛି ଏବଂ ତାଙ୍କ ସଂସ୍ପର୍ଶରେ ଆସିଥିବା ୧୫ ଜଣଙ୍କୁ ସଂଗରୋଧ କରାଯାଇଛି । ଆଉ କେହି ତାଙ୍କ ସଂସ୍ପର୍ଶରେ ଆସିଛନ୍ତି କି ନାହିଁ ତାହା ଅନୁଧ୍ୟାନ ଚାଲିଛି ବୋଲି ଜିଲାପାଳ କହିଛନ୍ତି ।
