ବେତନଟୀ: ନିଶାସକ୍ତ ଅବସ୍ଥାରେ ରାସ୍ତାରେ ଗଡ଼ୁଥିବା ଜଣେ ପୁଲିସ୍ ଏସ୍ଆଇଙ୍କୁ ବୁଧବାର ଆରକ୍ଷୀ ଅଧୀକ୍ଷକ ନିଲମ୍ବନ କରିଛନ୍ତି। ଏପରି ଘଟଣା ଘଟିଛି ମୟୁରଭଞ୍ଜ ଜିଲା ବେତନଟୀରେ।
ସୂଚନା ଅନୁସାରେ, ବେତନଟୀ ଥାନା ଏସଆଇ ସଚ୍ଚିଦାନନ୍ଦ କିଶାନ ବୁଧବାର ଥାନା ଛକ ନିକଟ ଏକ ଦୋକାନ ଆଗରେ ନିଶାଗ୍ରସ୍ତ ହୋଇ ଗଡ଼ୁଥିଲେ। ଏନେଇ ଲୋକେ ପ୍ରତିବାଦ କରିବା ସହ ଏସଆଇଙ୍କ ଭିଡିଓ ଉତ୍ତୋଳନ କରିଥିଲେ। ଏହା ସହିତ ଏସ୍ପିଙ୍କୁ ମଧ୍ୟ ଖବର ଦେଇଥିଲେ। ଏହାପରେ ଜିଲା ଆରକ୍ଷୀ ଅଧୀକ୍ଷକ ପରମାର ସ୍ମିଥ ପୁରୁଷୋତ୍ତୋମ ଦାସଙ୍କ ନିର୍ଦେଶକ୍ରମେ ପୁଲିସ ଘଟଣାସ୍ଥଳରେ ପହଞ୍ଚି ଏସଆଇଙ୍କୁ ନେଇ ଯାଇଥିଲେ। ଏସଆଇଙ୍କ ମଦ ପିଇବାକୁ ନେଇ ପୁଲିସ ଓ ସ୍ଥାନୀୟ ଲୋକଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ଓ ଖବର ଭାଇରାଲ୍ ହୋଇଥିଲା। ଏହାପରେ ଆରକ୍ଷୀ ଅଧୀକ୍ଷକ ଗତକାଲି ରାତିରେ ଏସଆଇ ସଚ୍ଚିଦାନନ୍ଦ କିଷାନଙ୍କୁ ନିଲମ୍ବନ କରିଛନ୍ତି। ଏସଆଇଙ୍କୁ ନିଲମ୍ବନ କରାଯାଇଥିବା ଏସ୍ପି ଟ୍ବିଟ୍ କରି ସୂଚନା ଦେଇଛନ୍ତି। ବେତନଟୀ ଅଞ୍ଚଳରେ ଏହି ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି।
