ବେଙ୍ଗାଲୁର : ସାମ୍ବାଦିକା ଗୌରୀ ଲଙ୍କେଶ ହତ୍ୟା ମାମଲାରେ ସ୍ୱତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ହିନ୍ଦୁ ଯୁବ ସେନାର ସଦସ୍ୟ କେଟି ନବୀନ କୁମାର ନାମକ ଜଣେ ଯୁବକଙ୍କୁ ଶୁକ୍ରବାର ଗିରଫ କରିଛି । ବେଆଇନ ଭାବେ ମାରଣାସ୍ତ୍ର ରଖିବା ଅଭିଯୋଗରେ ତାଙ୍କୁ ଫେବୃଆରୀ ୧୮ରେ ବେଙ୍ଗାଲୁର ପୁଲିସ୍ ଗିରଫ କରିଥିଲା । ଗୌରୀ ଲଙ୍କେଶ ହତ୍ୟାକାଣ୍ଡରେ ନବୀନ କୁମାରର ସଂପୃକ୍ତି ନେଇ ତାର କେତେକ ସାଙ୍ଗର ବୟାନକୁ ଭିତ୍ତି କରି ଏସ୍ଆଇଟି ତାକୁ ଜେରା କରିଥିଲା । ଗୌରୀ ଲଙ୍ଗେଶ ହତ୍ୟାରେ ସଂପୃକ୍ତି ନେଇ ନବୀନ କୁମାର ସ୍ୱୀକାର କରିଛି ବୋଲି ଏସ୍ଆଇଟି ପକ୍ଷରୁ ଏକ ମୁଦା ଲଫାପା ଅତିରିକ୍ତ ମୁଖ୍ୟ ଦୌରାଜଜ୍ଙ୍କ ଅଦାଲତରେ ଉପସ୍ଥାପିତ କରାଯାଇଛି । ଏହାସହ ହତ୍ୟାକାଣ୍ଡର ରହସ୍ୟ ଉପରୁ ପରଦା ଉଠାଇବା ପାଇଁ ଅଭିଯୁକ୍ତ ନବୀନ କୁମାରଙ୍କୁ ୮ ଦିନିଆ ରିମାଣ୍ଡରେ ନେବାକୁ ଏସ୍ଆଇଟି ଆବେଦନ କରିଛି । ଗୌରୀ ଲଙ୍କେଶ ହତ୍ୟାକାଣ୍ଡର ପ୍ରଥମ ଅଭିଯୁକ୍ତ ଭାବେ ନବୀନ କୁମାର ନାମ ପ୍ରଘଟ କରାଯାଇଛି । ହତ୍ୟାକାଣ୍ଡ ତଦନ୍ତ ରିପୋର୍ଟ ଅନୁସାରେ ୨୦୧୫ ଅଗଷ୍ଟ ୩୦ରେ କନ୍ନଡ ଗବେଷକ ଏମ୍ଏମ୍ କାଲୁବୁର୍ଗିଙ୍କ ହତ୍ୟାକାଣ୍ଡ ଓ ୨୦୧୭ ସେପ୍ଟେମ୍ବର ୫ରେ ସାମ୍ବାଦିକା ଗୌରୀ ଲଙ୍କେଶ ହତ୍ୟାକାଣ୍ଡ ପାଇଁ ସମାନ ବନ୍ଧୁକ ବ୍ୟବହାର କରାଯାଇଥିଲା ।
