ନୂଆଦିଲ୍ଲୀ: ଆତଙ୍କବାଦକୁ ପ୍ରୋତ୍ସାହନ ଦେଉଥିବା ଦେଶ ପାକିସ୍ତାନ ବାଧ୍ୟ ହୋଇ ସାରା ବିଶ୍ୱର ଚାପ ଆଗରେ ମୁଣ୍ଡ ନୁଆଁଇଛି । ହାପିଜ ସୟିଦର ସଂଗଠନ ଜମାତ-ଉଦ୍-ଦାବା ଓ ଫଲାହ-ଏ –ଇନସାନିୟତ ଉପରେ କଟକଣା ଲଗାଇଛି । ଏହି ଦୁଇ ସଂଗଠନର ବ୍ୟାଙ୍କ ଆକାଉଣ୍ଟକୁ ଜବତ କରାଯାଇଛି । ପାକିସ୍ତନର ପ୍ରଧାନମନ୍ତ୍ରୀ ଶାହିଦ୍ ଖପାନ୍ ଓବାସି ଆତଙ୍କବାଦୀ ହାଫିଜ୍ର ସଂଗଠନ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ସୂଚନା ଦେଇଛନ୍ତି ।
ସେହିପରି ଆନ୍ତରିକ ମନ୍ତ୍ରାଳୟ ହାଫିଜ ସୟିଦର ସଂଗଠନ ଜମାତ-ଉଦ୍-ଦାବା ଓ ଫଲାହ-ଏ –ଇନସାନିୟତ ସମସ୍ତ ସମ୍ପତି ଜବତ କରିବା ପାଇଁ ନିର୍ଦେଶ ଦେଇଛନ୍ତି । ଏଥିପାଇଁ ସଂଗଠନର ୭୦ରୁ ଅଧିକ ଲୋକଙ୍କର ଆକାଉଣ୍ଟ ଅଚଳ କରାଯାଇଛି ।
ପାକିସ୍ତାନରେ ଥିବା ପଞ୍ଜାବ ଓ ଇସଲାମାବାଦ ଅଞ୍ଚଳରେ ଏହି ଦୁଇ ସଂଗଠନର ଥିବା ବିଭିନ୍ନ ସମ୍ପତିକୁ ଜବତ କରାଯାଇଛି । ଏହି ଦୁଇ ସଂଗଠନର ୪୦ଟି ଓ୍ୱେବସାଇଟ୍କୁ ବନ୍ଦ କରାଯାଇଥିବା ବେଳେ ୧୭୦ଟି ସମ୍ପତ୍ତିକୁ ଜବତ କରାଯାଇଥିବା ସୂଚନା ମିଳିଛି । ପାକିସ୍ତାନ ସରକାର ପତ୍ର ଲେଖିକରି ଟେଲିଯୋଗାଯୋଗ ପ୍ରାଧିକରଣକୁ ଏହି ଓ୍ୱେବସାଇଟ୍ ଗୁଡିକୁ ବନ୍ଦ କରିବାପାଇଁ ନିର୍ଦେଶ ଦେଇଛନ୍ତି ।