ଭୁବନେଶ୍ଵର: ଟୋକନ ବ୍ୟବସ୍ଥାରେ ଧାନ କିଣାକୁ ବିରୋଧ କରି ପଶ୍ଚିମ ଓଡ଼ିଶାରେ ଚାଷୀ ଆନ୍ଦୋଳନ ଦିନକୁ ଦିନ ବଢ଼ିବାରେ ଲାଗି। ଜିଲାପାଳଙ୍କ କାର୍ଯ୍ୟାଳୟ, ବିଧାୟକଙ୍କ କାର୍ଯ୍ୟାଳୟ ଆଗରେ ଧାନ ବସ୍ତା ଗଦାଇ ଚାଷୀମାନେ ପ୍ରତିବାଦ କରିବା ପରେ ବୁଧବାର ବରଗଡ଼ ଜିଲା ଅତାବିରା ଅଞ୍ଚଳରେ ୧୨ ଘଣ୍ଟିଆ ବନ୍ଦ ପାଳନ କରାଯାଇଛି। କିନ୍ତୁ ସରକାର ଚାଷୀଙ୍କ ଦାବିକୁ ଗ୍ରହଣ କରି ନାହାନ୍ତି। ଟୋକନ ବ୍ୟବସ୍ଥା ଅଛି ଏବଂ ଏହା ଆଗକୁ ମଧ୍ୟ ରହିବ ବୋଲି ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି।
ମନ୍ତ୍ରୀ ସ୍ବାଇଁ ଗଣମାଧ୍ୟମରେ ପ୍ରତିକ୍ରିୟା ଦେଇ କହିଛନ୍ତି, ଚାଷୀଙ୍କଠାରୁ ଧାନ କ୍ରୟ ପାଇଁ ପ୍ରଚଳିତ ଟୋକନ ବ୍ୟବସ୍ଥା ରହିଛି। ଆଗକୁ ମଧ୍ୟ ଏହି ବ୍ୟବସ୍ଥା ରହିବ। ଧାନ କିଣାରେ ସ୍ବଚ୍ଛତା ଆଣିବା ଲାଗି ଏଭଳି ଏକ ନୂଆ ବ୍ୟବସ୍ଥା ଲାଗୁ କରାଯାଇଛି। ଚାଷୀମାନେ ଏଥିରେ ସହଯୋଗ କରନ୍ତୁ। ସ୍ବଚ୍ଛ ଏବଂ ନିର୍ମଳ ଭାବେ ଧାନ କିଣାଯିବାର ବ୍ୟବସ୍ଥା କରାଯାଇଛି। ଏହି ବ୍ୟବସ୍ଥା ଜରିଆରେ ଚାଷୀମାନେ ସେମାନଙ୍କ ଧାନର ଉଚିତ୍ ମୂଲ୍ୟ ପାଇପାରିବେ। କୌଣସି ସ୍ଥାନରେ ଟୋକନ ବ୍ୟବସ୍ଥାକୁ ନେଇ ଅସୁବିଧା ଥିଲେ ଚାଷୀମାନେ ଅଭିଯୋଗ କରିପାରିବେ। ଚାଷୀଙ୍କ ପ୍ରସ୍ତାବକୁ ସରକାର ଗ୍ରହଣ କରି ଉନ୍ନତି କଥା ଚିନ୍ତା କରିବେ ବୋଲି ମନ୍ତ୍ରୀ କହିଛନ୍ତି।
