ଟିଟଲାଗଡ଼: ବାପାର ଗୋଇଠା ମାଡରେ ଏକ ମାସର ଶିଶୁ କନ୍ୟାର ମୃତ୍ୟୁ ହୋଇଥିବା ଅଭିଯୋଗ ହୋଇଛି। ମୃତ ଶିଶୁର ମା’ ନିଜ ସ୍ବାମୀ ନାମରେ ଟିଟିଲାଗଡ ଥାନାରେ ଅଭିଯୋଗ କରିଛନ୍ତି । ପୁଲିସ ଏହି ଘଟଣାକୁ ନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏଭଳି ଏକ ଅଭାବନୀୟ ଘଟଣା ବଲାଙ୍ଗିର ଜିଲା ଟିଟିଲାଗଡ ଥାନା ଅନ୍ତର୍ଗତ ମନିଗାଁରେ ଘଟିଛି। ଅଭିଯୁକ୍ତ ବାପା ନାମ ହେଲା ପ୍ରଦୀପ ବାଗ(୩୦)।
ମିଳିଥିବା ସୂଚନା ଅନୁଯାୟୀ, ପ୍ରଦୀପ ବାଗ କିଛି ଦିନ ପୂର୍ବେ ସେହି ଗ୍ରାମର ସସ୍ମିତାଙ୍କୁ ବିବାହ କରିଥିଲା। ଉଭୟଙ୍କ ମଧ୍ୟରେ ସର୍ବଦା କଳି ଝଗଡା ଲାଗି ରହୁଥିଲା। ଅକ୍ଟୋବର ୧୮ ତାରିଖରେ ସେମାନଙ୍କର ଏକ ଝିଅ ଜନ୍ମ ହୋଇଥିଲା। ଗତ ରବିବାର ସନ୍ଧ୍ୟାରେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ସସ୍ମିତା ଝିଅକୁ ଧରି ଶୋଇଥିବା ବେଳେ ପ୍ରଦୀପ ତାକୁ ଗୋଇଠା ମାରିଥିଲା। କିନ୍ତୁ ସସ୍ମିତା ଦେହରେ ବାଜିବା ପରିବର୍ତ୍ତେ ଶିଶୁକନ୍ୟା ଦେହରେ ବାଜିଥିଲା। ଫଳରେ ଝିଅଟି ଛିଟିକି ପଡିଥିଲା। ରାଗ ଶାନ୍ତ ପରେ ପ୍ରଦୀପ ଝିଅକୁ ଡାକ୍ତରଖାନା ନେଇଥିଲା କିନ୍ତୁ ସେତେବେଳକୁ ଶିଶୁଟିର ମୃତ୍ୟୁ ହୋଇ ସାରିଥିଲା। ଡାକ୍ତର ଶିଶୁକନ୍ୟାଟିକୁ ମୃତ ଘୋଷଣା କରିଥିଲେ।
