ନୂଆଦିଲ୍ଲୀ/ଭୁବନେଶ୍ୱର: ଗତ କିଛି ଦିନ ହେବ ବିଭିନ୍ନ ସାମାଜିକ ଗଣମାଧ୍ୟମରେ ସର୍ବ ବୃହତ ଜୀବନ ବୀମା କମ୍ପାନୀ ଏଲଆଇସି ଏବଂ ବୃହତ ଟେଲିକମ କମ୍ପାନୀ ବିଏସଏନଏଲ ବିରୁଦ୍ଧରେ ଚାଲିଥିବା ଅପପ୍ରଚାରର ଅନ୍ତଃ ଘଟିଛି। ଏଲଆଇସି ପକ୍ଷରୁ ଜାରି ଏକ ପ୍ରେସ ବିଜ୍ଞପ୍ତିରେ କୁହାଯାଇଛି ଯେ ଉପଭୋକ୍ତାମାନଙ୍କ ଜମା ଅର୍ଥ ସୁରକ୍ଷିତ ଏବଂ ନିରାପଦ ଅଛି। ସାମାଜିକ ଗଣମାଧ୍ୟମରେ ଗୁଜବ ପ୍ରଚାର ହୋଇଥିଲା ଯେ ଏଲଆଇସି ଏବେ ବହୁତ କ୍ଷତିରେ ଚାଲିଛି। ତେବେ କମ୍ପାନୀକୁ ବଦନାମ କରିବାକୁ କିଛି ନ୍ୟସ୍ତସ୍ୱାର୍ଥ ସଂଗଠନ ଏପରି କରିଥିବା ଏଲଆଇସି କହିଛି। ୨୦୧୮-୧୯ ଆର୍ଥିକ ବର୍ଷ ପାଇଁ ଏଲଆଇସି ୫୦ ହଜାର କୋଟି ଟଙ୍କା ବୋନସ ଦେଇଥିବା ଜଣାପଡିଛି।
ଅନ୍ୟପକ୍ଷରେ ବିଏସଏନଏଲ ବନ୍ଦ ହେବା ନେଇ ସାମାଜିକ ଗଣମାଧ୍ୟମରେ ଗୁଜବ ପ୍ରସାରିତ ହେବାପରେ ବିଏସଏନଏଲର ଓଡ଼ିଶା ଶାଖା ମୁଖ୍ୟ ମହାପ୍ରବନ୍ଧକ ଡକ୍ଟର ଉଦୟ ଶଙ୍କର ପଣ୍ଡା ପ୍ରେସ ବିଜ୍ଞପ୍ତି ମାଧ୍ୟମରେ ଏହାକୁ ଖଣ୍ଡନ କରିଛନ୍ତି। ସେ କହିଛନ୍ତି, ଅନ୍ୟ ପ୍ରତିଦ୍ୱନ୍ଦ୍ୱିମାନେ ଷଡଯନ୍ତ୍ର କରିବା ସହ ବିଏସଏନଏଲ ବିରୁଦ୍ଧରେ ଅପପ୍ରଚାର କରୁଛନ୍ତି। ଏହା ସମ୍ପୂର୍ଣ୍ଣ ମିଥ୍ୟା ଓ ଭିତ୍ତିହୀନ ବୋଲି ସେ କହିଛନ୍ତି। ବିଏସଏନଏଲ ତାର ଗ୍ରାହକମାନଙ୍କ ସହ ସବୁବେଳେ ରହିଛି ଓ ସୁଲଭ ମୂଲ୍ୟରେ ସେବା ଯୋଗାଇ ଦେବା ପାଇଁ ପ୍ରତିଶୃତିବଦ୍ଧ ବୋଲି ସେ କହିଛନ୍ତି।
