ବଲାଙ୍ଗୀର: ବଲାଙ୍ଗୀରର ତଳି ଅଞ୍ଚଳରେ ଥିବା ଡ୍ୟାମପଡା ବସ୍ତିରେ ରୁହନ୍ତି ପରିବା ବେପାରୀ ଭୀମ ସାହୁ। ୬୦ ବର୍ଷିୟ ଭୀମ, ତାଙ୍କ ସ୍ତ୍ରୀ ଉର୍ମିଳା ଓ ଝିଅ ମହିମା ସାହୁଙ୍କୁ ନେଇ ଏକ କୁଡିଆ ଘରେ ରହିଥାନ୍ତି। ନିଜର ଜମି ଖଣ୍ଡେ ନଥିବାରୁ ପ୍ରାୟ ୪୦ ବର୍ଷରୁ ଉର୍ଦ୍ଧ ହେବ ଭୀମ ସାହୁ ଡ୍ୟାମପଡା ବସ୍ତିରେ ରହିଆସୁଛନ୍ତି। ନିଜସ୍ୱ ଜାଗା ନଥିବାରୁ ପୌରପରିଷଦ ପକ୍ଷରୁ ତାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ମିଳି ନଥିଲା। ଫଳରେ ନିଜ ଉପାର୍ଜନ ଅନୁସାରେ ଏକ ଛୋଟ ଚାଳ ଛପର ଘର କରି ରହୁଥିଲେ ଭୀମ । କିନ୍ତୁ ବଲାଙ୍ଗୀରରେ ହୋଇଥିବା ବନ୍ୟା ତାଙ୍କ ପାଇଁ ବଇରି ସାଜିଲା।ଗତ ବନ୍ୟାରେ ଲକ୍ଷ୍ମୀଯୋରର ଉଛୁଲା ପାଣି ମାଡିଯାଇଥିଲା। ଫଳରେ ଭୀମଙ୍କ ଘର ଚାରିପଟେ ଏକ ଜଳାଶୟ ଭଳି ପାଣି ଘେରିରହିଥିଲା। ଘରର ସମସ୍ତ ସାମଗ୍ରୀ ନେଇ ସେ କ୍ଲବ ଘରେ ଆଶ୍ରୟ ନେଇଥିଲେ। ଗତ ତିନି ଦିନ ତଳେ ପାଣି କିଛିଟା କମିବା ପରେ ସେ ନିଜ ଘରକୁ ଫେରିଥିବା ବେଳେ ଦୁଇ ଦିନର ଲଗାଣ ବର୍ଷାରେ ପୁଣି ତାଙ୍କ ଘରକୁ ପାଣି ଘେରିଯାଇଥିବା ଦେଖିବାକୁ ମିଲିଛି। ସଂପୂର୍ଣ୍ଣ ଭାବେ ତାଙ୍କ ଘର ପାଣିରେ ଭାସମାନ ଅବସ୍ଥାରେ ରହିଥିବା ବେଳେ ବିଷାକ୍ତ ସାପ କେତେବେଳେ ସେମାନଙ୍କ ଜୀବନ ନେବ ତାହା କହିବା ମୁସ୍କିଲ। ଭୀମ ଆଉ କିଛି କାମ ଧନ୍ଦା କରିପାରୁନାହାନ୍ତି। ଝିଅ ଏକ ସୋରୁମରେ କାମ କରୁଥିବାରୁ ତାଙ୍କ ଉପରେ ନିର୍ଭର କରି ଚଳିଯାଉଛି ପରିବାର। କିନ୍ତୁ ଝିଅର ସ୍ୱଳ୍ପ ରୋଜଗାରରେ ଘର ଖଣ୍ଡେ କରିବା ତ ଦୁରର କଥା ଭଙ୍ଗା ଘରକୁ ମରାମତି କରିବା ବି ସମ୍ଭବପର ନୁହେଁ। ପାଣି ଭୟରେ ଗତ ଦୁଇ ଦିନ ଧରି ପରିବାରର କାହାରି ଆଖିରେ ନିଦ ନଥିବା ବେଳେ କେମିତି ଘେରି ରହିଥିବା ପାଣି ଶୁଖାଇବେ ସେହି ଚିନ୍ତାରେ ପରିବାର ଲୋକ।
