ଫୁଲବାଣୀ: କନ୍ଧମାଳରେ ମଙ୍ଗଳବାର ୮ ଜଣ ଜେଲ୍ ଅନ୍ତେବାସୀଙ୍କ ସମେତ ୬୨ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଚିହ୍ନଟ ସଂକ୍ରମିତଙ୍କ ମଧ୍ୟରେ ୪୨ ଜଣ ପୁରୁଷ ଥିବା ବେଳେ ୨୦ ଜଣ ମହିଳା ଅଛନ୍ତି। ସର୍ବାଧିକ ୧୭ ଜଣ ବାଲିଗୁଡାରୁ ଚିହ୍ନଟ ହୋଇଥିବା ବେଳେ ଫୁଲବାଣୀରୁ ୩ ଜଣ, ଜି ଉଦୟଗିରିରୁ ୧୨, ଦାରିଙ୍ଗବାଡିରୁ ୨, ଟିକାବାଲିରୁ ୩, କେ ନୁଆଁଗାଁରୁ ୩, କୋଟଗଡରୁ ୬, ତୁମୁଡିବନ୍ଧରୁ ୬, ରାଇକିଆରୁ ୫, ପିରିଙ୍ଗିଆରୁ ୩ ଓ ଖଜୁରିପଡାରୁ ଜଣେ ଅଛନ୍ତି।
ସବୁଠାରୁ ବଡକଥା ହେଉଛି ଜି.ଉଦୟଗିରିରୁ ଚିହ୍ନଟ ହୋଇଥିବା ୧୨ ଜଣଙ୍କ ମଧ୍ୟରେ ୮ ଜଣ ଜି.ଉଦୟଗିରି ଜେଲର ବନ୍ଦି ଅନ୍ତେବାସୀ। ପୂବର୍ରୁ ମଧ୍ୟ ଏହି ଜେଲରୁ ଅନେକ ଅନ୍ତେବାସୀଙ୍କ ସମେତ କର୍ମଚାରୀ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଏହାକୁ ନେଇ ଜେଲ କର୍ତୃପକ୍ଷଙ୍କ ଚିନ୍ତା ବଢିଛି। ଫୁଲବାଣୀ ଜେଲରେ ଆବଶ୍ୟକତା ଠାରୁ ଅଧିକ ବନ୍ଦି ଥିବା ବେଳେ ସଂକ୍ରମିତ ଆଶଙ୍କା ମଧ୍ୟ ରହିଛି। ତେଣୁ ଗତକାଲି ଜେଲ ପରିସରକୁ ଅଗ୍ନୀଶମ ବିଭାଗ ଦ୍ୱାରା ସାନିଟାଇଜ୍ କରାଯାଇଥିଲା। ଆଜିର ୬୨ ସଂକ୍ରମିତଙ୍କୁ ମିଶାଇ ଜିଲ୍ଲାରେ ବର୍ତମାନ ସୁଦ୍ଧା ମୋଟ ୬୭୮ ସଂକ୍ରମିତ ଚିହ୍ନଟ ହେଲେଣି। ସେଥି ମଧ୍ୟରୁ ୩୭୦ ଜଣ ସୁସ୍ଥ ହୋଇ ସାରିଥିବା ବେଳେ ୨ ଜଙ୍କର ମୃତ୍ୟୁ ହୋଇ ଯାଇଛି। ବଳକା ୩୦୬ ଜଣ, କୋଭିଡ୍ ହସ୍ପିଟାଲ, କୋଭିଡ୍ କେୟାର ସେଂଟରରେ ଚିକିତ୍ସିତ ହେଉଥିବା ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଅନ୍ୟପକ୍ଷରେ ଜିଲାରେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବା ଯୋଗୁଁ ଜିଲାର ବିଭିନ୍ନ ଅଞ୍ଚଳକୁ କଣ୍ଟେନମେଣ୍ଟ ଜୋନ୍ ଭାବେ ଘୋଷଣା କରାଯାଇଛି।
