ସମାଜ ଡିଜିଟାଲ ଡେସ୍କ: ବିହାରରେ ଆସନ୍ତା ଅକ୍ଟୋବର କିମ୍ବା ନଭେମ୍ବର ମାସରେ ନିର୍ବାଚନ ଅନୁଷ୍ଠିତ ହେବାକୁ ଥିବାବେଳେ ଏହା ପୂର୍ବରୁ ମୁଖ୍ୟମନ୍ତ୍ରୀ ନିତିଶ କୁମାର ନିଜ ମନ୍ତ୍ରିମଣ୍ଡଳ ସମ୍ପ୍ରସାରଣ କରିଛନ୍ତି। ନୂତନ ମନ୍ତ୍ରିମଣ୍ଡଳରେ ବିଜେପିର ୭ ବିଧାୟକଙ୍କୁ ସାମିଲ କରାଯାଇଛି। ରାଜ୍ୟପାଳ ନୂଆ ମନ୍ତ୍ରୀମାନଙ୍କୁ ପଦ ଓ ଗୋପନୀୟତାର ସହିତ ଶପଥପାଠ କରାଇଛନ୍ତି। ମନ୍ତ୍ରିମଣ୍ଡଳ ସମ୍ପ୍ରସାରଣ ପୂର୍ବରୁ ଦିଲୀପ ଜୟସୱାଲ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ।
ନୂତନ ଭାବେ ମନ୍ତ୍ରିମଣ୍ଡଳରେ ସାମିଲ ହୋଇଥିବା ବିଜେପି ବିଧାୟକମାନେ ହେଲେ ବିଜୟ କୁମାର ମଣ୍ଡଳ, କୃଷ୍ଣ କୁମାର ମଣ୍ଟୁ, ମୋତିଲାଲ ପ୍ରସାଦ, ରାଜୁ କୁମାର ସିଂହ, ଜୀବେଶ ମିଶ୍ରା, ସୁନୀଲ କୁମାର ଏବଂ ସଞ୍ଜୟ ସରାଓଗି। ବିଧାୟକ ବିଜୟ କୁମାର ମଣ୍ଡଳ ୧୯୯୫ରେ ଭାରତୀୟ ପ୍ରଗତିଶୀଳ ପାର୍ଟିରୁ ନିର୍ବାଚନ ଜିତିଥିଲେ। ପରେ ୨୦୧୫ ଏବଂ ୨୦୨୦ରେ ବିଜେପି ଟିକେଟରୁ ସିକଟୀ ଆସନରୁ ନିର୍ବାଚନ ଜିତିଥିଲେ। କୃଷ୍ଣ କୁମାର ମଣ୍ଟୁ ୨୦୧୫ରେ ପ୍ରଥମେ ନିର୍ବାଚନ ଜିତିଥିଲେ। ପରେ ୨୦୨୦ରେ ବି ସେ ନିର୍ବାଚନରେ ବିଜୟୀ ହୋଇଥିଲେ। ମୋତିଲାଲ ପ୍ରସାଦ ମଧ୍ୟ ୨ ଥର ବିଧାନସଭାକୁ ନିର୍ବାଚିତ ହୋଇଛନ୍ତି।
