ଖୁଣ୍ଟା ; କରୋନାରୁ ସୁରକ୍ଷା ପାଇଁ ସରକାରଙ୍କ ଲକଡାଉନ ଘୋଷଣା ୨୧ ଦିନରେ ପହଞ୍ଚି ଥିବା ବେଳେ ଖୁଣ୍ଟା ଅବକାରୀ ବିଭାଗ ଖୁଣ୍ଟା ଥାନା ଅଧୀନ ପୁରୁଣା ବାରିପଦାରୁ ଜଣେ ବ୍ୟକ୍ତିଙ୍କ ନିକଟରୁ ୬୭.୪୭୦ଲି ବିଦେଶୀ ଲେବୁଲ ଥିବା ମଦ ଜବତ ହୋଇଛି। ଏହା ସହ ମଦ ବିକ୍ରିରେ ସମ୍ପୃକ୍ତ ଥିବା ଅଭିଯୋଗରେ ଜଣେ ଯୁବକକୁ ଗିରଫ କରିଛି ପୁଲିସ। ଗିରଫ ଯୁବକ ହେଲା ବଡ଼ସାହି ଥାନା ଛେଳିଆ(ଖ) ଗ୍ରାମର କିଶୋର କୁମାର(୩୪)।
କିଛି ଦିନ ପୂର୍ବେ ପୁରୁଣା ବାରିପଦା ନିକଟରେ ବିଦେଶୀ ମଦ ବିକ୍ରି ବାବଦରେ ଖବର ପାଇ ଚଢ଼ାଉ କରାଯାଇଥିଲେ ମଧ୍ୟ ସେତେବେଳେ ସମ୍ପୃକ୍ତ ମଦ ବେପାରୀ ଅଳ୍ପକେ ଖସିଯାଇଥିଲେ। ମଙ୍ଗଳବାର ସମ୍ପୂର୍ଣ୍ଣ ଲକଡାଉନ ଚାଲିଥିବା ବେଳେ ଏତେ ପରିମାଣରେ ମଦ ଜବତ ହେବାରୁ ସେସବୁକୁ ନେଇ ପ୍ରଶାସନ ସମେତ ଜନସାଧାରଣଙ୍କ ଚିନ୍ତାକୁ ଦ୍ବିଗୁଣିତ କରିଛି। ୨୧ ଦିନର ଲାକଡାଉନ ମଧ୍ୟରେ କେଉଁ ଠାରୁ ଏବଂ କିପରି ଭାବେ ସେସବୁକୁ ଯୋଗାଣ କରାଯାଇଥିଲା ତାହା ତଦନ୍ତ ମଧ୍ୟକୁ ଆସିବା ଜରୁରୀ ହୋଇପଡିଛି । ଯଦି ସିଲ ହୋଇନଥିବ କିମ୍ବା ଲେବୁଲ ଜାଲ କରାଯାଇଥିବ ତେବେ ଖୁଣ୍ଟା ଥାନା ଅଞ୍ଚଳରେ ଆଉ ଏକ ମଦ ମୃତ୍ୟୁ ସମ୍ଭାବନାକୁ ଏଡାଇଦେଇ ହବନାହିଁ। ଏତେ କଟକଣା ମଧ୍ୟରେ ମଙ୍ଗଳବାର ପୁରୁଣା ବାରିପଦାରେ ଖୋଲାଖୋଲି ମଦ ବିକ୍ରି ହେଉଥିବା ସୂଚନା ପାଇ ମାଜିଷ୍ଟ୍ରେଟଙ୍କ ସହିତ ଖୁଣ୍ଟା ଅବକାରୀ ବିଭାଗର ଏକ ଦଳ ଚଢ଼ାଉ କରିଥିଲେ।
ସୂଚନାଯୋଗ୍ୟ ଯେ, ଗତ ମାର୍ଚ୍ଚ ୨୬ ତାରିଖରେ ଏହି ଥାନା ଅଧିନ ଭୋଳାଗଡ଼ିଆ ନିକଟରୁ ଏକ ଭୁଷି ମାଲ ବିକ୍ରି ହେଉଥିବା ଦୋକାନରୁ ସାଢେ ୩୬ ଲି ବିଦେଶୀ ମଦ ସବୁକୁ ପୁଲିସ ଜବତ କରିଥିଲା। ଘଟଣାର ସମୟକୁ ଦେଖିଲେ ଉଭୟ ଘଟଣାରେ ମଦ ଗୁଡିକ କିଏ ଯୋଗାଇଛି ଓ କେମିତି ଆସି ପହଁଚିଛି ସେ ବାବଦରେ ନା ପୁଲିସ ନା ଅବକାରୀ ବିଭାଗ କେହି ହେଲେ ଜାଣିପାରିନାହାନ୍ତି। କଟକଣା ଯୋଗୁ ମଦ ଦୋକାନ ସବୁ ବନ୍ଦ ରହିଥିବା ବେଳେ ଜବତ ମଦ ସବୁ ଯଦି ନକଲି ବିଦେଶୀ ମଦ ହୋଇଥାଏ ତେବେ କରୋନା ନିୟନ୍ତ୍ରଣରେ ସମ୍ପୂର୍ଣ ବ୍ୟସ୍ତ ଥିବା ପ୍ରଶାସନକୁ ମଦ ମୃତ୍ୟୁ ଭଳି ଆଉ ଏକ ବିପଦର ଯେ ସମ୍ମୁଖୀନ ହେବାକୁ ନପଡିବ ତାହା କହିହେବ ନାହିଁ। ଆଜି ଚଢ଼ାଉରେ ଉଦଳା ଅବକାରୀ ନିରୀକ୍ଷକ ଅଭିରାମ ବେହେରା, ଖୁଣ୍ଟା ଭାରପ୍ରାପ୍ତ ଅଧିକାରୀ ରାଜୀବ କୁମାର, ଅତିରିକ୍ତ ଉପ ନିରୀକ୍ଷକ ଶରତ ଚନ୍ଦ୍ର ବାରିକ ଅନ୍ୟ କର୍ମଚାରୀ ମାନେ ସାମିଲ ଥିଲେ।
