ଜଙ୍ଗଲରୁ ୫୨କିଲୋ ସୁନା, ନଗଦ ୧୦ କୋଟି ଜବତ

ଭୋପାଳ: ଆୟକର ବିଭାଗ ଅଧିକାରୀମାନେ ଶୁକ୍ରବାର ମଧ୍ୟପ୍ରଦେଶର ରାଜଧାନୀ ଭୋପାଳ ନିକଟସ୍ଥ ମିଣ୍ଡୋରି ଜଙ୍ଗଲରୁ ଏକ ପରିତ୍ୟକ୍ତ କାରରୁ ୫୨ କିଲୋ ଓଜନର ସୁନା ବିସ୍କୁଟ ଓ ନଗଦ ୧୦ କୋଟି ଟଙ୍କା ଜବତ କରିଥିବା ଜଣାପଡିଛି। ଜବତ ସୁନା ବିସ୍କୁଟର ମୂଲ୍ୟ ୪୦ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ପ୍ରବର୍ତ୍ତନ ନିର୍ଦେଶାଳୟ (ଇଡି), ଲୋକାୟୁକ୍ତ ପୁଲିସର ମିଳିତ ସହଯୋଗରେ ଆୟକର ବିଭାଗ ପକ୍ଷରୁ ରିଏଲ ଇଷ୍ଟେଟ ବ୍ୟବସାୟୀଙ୍କ ଉପରେ ଚଢଉ ଜାରି ରହିଛି। ଏହି ପରିପ୍ରେକ୍ଷୀରେ ଆୟକର ବିଭାଗକୁ ଗୁରୁବାର ରାତି ୨ଟାରେ ଏକ ଫୋନକଲ ମିଳିଥିଲା। ତଦନୁଯାୟୀ ମିଣ୍ଡୋରି ଜଙ୍ଗଲରେ ଥିବା ଏକ ପରିତ୍ୟକ୍ତ କାର୍‌ରେ ୫୨ କିଲୋ ଓଜନର ସୁନା ରଖାଯାଇଥିବା ସୂଚନା ଦିଆଯାଇଥିଲା। ଏହାକୁ ଆଧାର କରି ୩୦ଟି ଗାଡିରେ ୧୦୦ ପୁଲିସ କର୍ମୀ ଉକ୍ତ ଜଙ୍ଗଲରେ ପହଞ୍ଚି ଏକ ଇନୋଭା କାର୍‌କୁ ଠାବ କରିଥିଲେ। ତେବେ କାର୍‌ ମଧ୍ୟରେ କୌଣସିି ଆରୋହୀ ନଥିବା ଜଣାପଡିଥିଲା। ତଲାସି ସମୟରେ ଦୁଇଟି ବ୍ୟାଗରେ ଭର୍ତ୍ତି ହୋଇଥିବା ସୁନା ବିସ୍କୁଟ ଓ ନଗଦ ଟଙ୍କା ବିଡା ମିଳିଥିଲା। ଉକ୍ତ ଇନୋଭା କାର୍‌ଟି ଗ୍ବାଲିୟର ବାସିନ୍ଦା ଚେତନ ଗୌଡଙ୍କ ନାମରେ ପଞ୍ଜୀକୃତ ହୋଇଥିବାବେଳେ ​ସେ ଆଞ୍ଚଳିକ ପରିବହନ କାର୍ଯ୍ୟାଳୟର ଜଣେ ପୂର୍ବତନ କର୍ମଚାରୀ ସୌରଭ ଶର୍ମାଙ୍କ ଘନିଷ୍ଠ ବୋଲି ଜଣାପଡିଛି। ତେବେ ଜବତ ସୁନା ଓ ନଗଦ ଟଙ୍କାର କେହି ଦାବିଦାର ସାମନାକୁ ଆସିନାହାନ୍ତି। ବିଗତ ଦୁଇଦିନ ଧରି ଭୋପାଳ ସହରର ବିଭିନ୍ନ ରିଏଲ ଇଷ୍ଟେଟ ବ୍ୟବସାୟୀଙ୍କ ଘର ଓ କାର୍ଯ୍ୟାଳୟ ଉପରେ ଚଢଉ ଜାରି ରହିଛି। ରାଜନେତା ଓ ବରିଷ୍ଠ ପ୍ରଶାସନିକ ଅଧିକାରୀଙ୍କ ଛତ୍ରଛାୟାରେ ରହି କେତେକ ବ୍ୟବସାୟୀ ଅସାଧୁ ଭାବେ ନିଜର ବ୍ୟବସାୟ ଚଳାଇଥିବାର ପ୍ରମାଣ ମିଳିଛି।