ରେଙ୍ଗାଲି : ରେଙ୍ଗାଲି ବ୍ଲକ ଗୁରୁପାଲିଠାରେ ଥିବା ଆର୍ ଆର୍ କଲୋନୀରେ ଆଦିତ୍ୟ ଆଲୁମିନିୟମ କମ୍ପାନୀର ଖାମଖିଆଲି ମନୋଭାବ ଯୋଗୁଁ ବିଦ୍ୟତ୍ ଆଘାତ ଲାଗି ଏକ ୨ ବର୍ଷର ଝିଅ ଅଳ୍ପକେ ମୃତ୍ୟୁ ମୁଖରୁ ବର୍ତ୍ତିଯାଇଥିବା ବେଳେ ତିନି ଜଣ ଗୁରୁତର ଆହତ ହୋଇଥିବା ଜଣାପଡ଼ିଛି। ସେଥି ମଧ୍ୟରୁ ଜଣକର ଅବସ୍ଥା ଅତ୍ୟନ୍ତ ଗୁରୁତର ହୋଇ ମୁତ୍ୟୁ ସହ ସଂଗ୍ରାମ କରୁଛନ୍ତି।
ସୂଚନା ଅନୁସାରେ, ବୁଧୁବାର ଦିନ ଆର୍ ଆର୍ କଲୋନୀ ନିବାସୀ ଜଗନ୍ନାଥ କିଷାନଙ୍କ ଦୁଇ ବର୍ଷର ଝିଅ ପ୍ରାଚୀ ଘର ଅଗଣାରେ ଖେଳୁଥିବା ସମୟରେ ହଠାତ୍ ଆର୍ଥିଙ୍ଗ୍ ହେବାରୁ ବିଦ୍ୟୁତ୍ ଆଘାତ ଲାଗିବା ଆରମ୍ଭ ହୋଇଥିଲା। ପ୍ରାଚୀଙ୍କୁ ବିଦ୍ୟୁତ ଆଘାତ ଲାଗୁଥିବା ଦେଖି ଜଗନ୍ନାଥ ଏବଂ ତାଙ୍କ ବାପା ଓ ଭାଇ ଦୌଡ଼ି ଆସି କୌଶଳକ୍ରମେ ପ୍ରାଚୀଙ୍କୁ ବଞ୍ଚେଇବାକୁ ଚେଷ୍ଟା କରିଥିଲେ। ଭାଗ୍ୟ ବଶତଃ ପ୍ରାଚୀ ବିଦ୍ୟୁତ୍ କବଳରୁ ରକ୍ଷା ପାଇଯାଇଥିଲେ। କିନ୍ତୁ ଅନ୍ୟ ତିନି ଜଣ ଅର୍ଥାତ୍ ଜଗନ୍ନାଥ, ତାଙ୍କ ବାପା ଓ ଭାଇ ସଂଜ୍ଞା ହୀନ ହୋଇ ପଡିଯାଇଥିଲେ। ବିଦ୍ୟୁତ୍ ଆଘାତ ଏତେ ଭୟଙ୍କର ଥିଲାଯେ ଜଗନ୍ନାଥଙ୍କ ବାପାଙ୍କ ଏକ ଆଙ୍ଗୁଠି ଛିଣ୍ଡି ପଡିଛି। ତୁରନ୍ତ ତାଙ୍କୁ ପ୍ରାଥମିକ ଚିକିତ୍ସା ପାଇଁ ବିର୍ଲାକମ୍ପାନୀ ଡାକ୍ତରଖାନାକୁ ନିଆ ଯାଇଥିଲା କିନ୍ତୁ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ସମ୍ବଲପୁର ସଦର ଡାକ୍ତରଖାନାକୁ ପଠାଯାଇଛି।
